АҮЭБ-ийн Дэд сайд Б.Энхтүвшин, Төрийн нарийн бичгийн дарга Б. Дашпүрэв нар цаг үеийн асуудлаар мэдээлэл өглөө. 

Салбарын Дэд сайд "Манай улс ОХУ-аас 95, БНХАУ-аас 5 хувийн түлшний импортоо хангадаг. Улсын сарын хэрэглээ 2200 орчим тонн байдаг. 12 дугаар сарын байдлаар ОХУ-аас 83.6 мянган тонн АИ-92, 134.2 мянган тонн дизель түлш, 1560 тонн АИ-95 түлш худалдаж авахаар баталгаажуулсан. 

Өнөөдрийн байдлаар нийт шатахуун хангамжийн 50 хувь хүрэхгүй хувийг импортоор оруулж ирээд байна. Сарын гуравны хоёр нь өнгөрчхөөд байхад 50 хүрэхгүй байна гэдэг шатахууны хомсдол үүсэхэд хүргэж байна. ОХУ-ын дотоод нөхцөл байдал хүндрэлтэй байна. Гэсэн ч Монгол Улсад боломж бололцоогоороо түлш нийлүүлж байна. 

Монгол Улсад өдөрт 40-60 вагон АИ-92 түлш орж ирвэл нөөц үүсэхгүйгээр өдрийнхөө хэрэгцээг хангах боломжтой. Гэхдээ энэ сар гарсаар дөрвөн удаа л 40-өөс дээш вагон орж ирсэн. 

Улаанбаатарт 280 гаруй шатахуун түгээх станц байна. Эдгээрийн гуравны нэгийг нь ээлжилж түлшээр хангаж байна. 

Нөөц дүүрэхгүй байгаа учраас орж ирсэн вагон бүрийг орон нутаг, нийслэлийн ШТС-уудаар өнөөдөр нэгд нь өгсөн бол маргааш нь нөгөөд нь өгөх байдлаар зохицуулалт хийж байна. Ард иргэд нөхцөл байдлыг ойлгож, анхааралдаа авч хамтарч ажиллах шаардлага байна гэдгийг хэлмээр байна" гэв.

БНХАУ-тай 2025 арваннэгдүгээр сард тодорхой хэмжээний түлш авах нийлүүлэлтийн гэрээ байгуулсан. Өнөөдөр оройдоо БНХАУ-аас 2900 тонн АИ-92, евро-5 төрлийн бүтээгдэхүүн орж ирэх аж.