Монгол Ардын Намын Удирдах зөвлөлийн хурал өнөөдөр боллоо. Хурлаас гарсан шийдвэрийн талаар МАН-ын ерөнхий нарийн бичгийн дарга Я.Содбаатар мэдээлэл өгөв.

Тэрбээр "Намын дотоод томилгоо, албан тушаалаас гадна нийгэмд үүсээд буй асуудлыг өнөөдрийн хурлаар хөндлөө. Тухайлбал улсын төсвийг цаг хугацаанд нь батлах шаардлагатай. Ерөнхий сайд шатахууны талаарх иргэдийн гомдол, багш, эмч нарын ажил хаялтын талаар мэдээлэл өглөө. Эрх баригч намын хувьд ойрын хугацаанд эдгээр асуудлыг шийдвэрлэх ёстой гэж үзсэн. 

МАН дотроо талцаад нэлээд хугацаа өнгөрсөн. Хоорондоо ойлголцож, уулаж ярилцах боломжийг нээх үүднээс ажлын хэсэг байгууллаа. Парламентын гишүүд, УЗ-ийн гишүүд, урьд нь намын даргаар ажиллаж байсан ахмадуудыг оролцуулсан. Өнөө маргаашдаа нэмж мэдээлэл аваад тодорхой шийдэл гаргах нь зүйтэй гэж үзлээ. 

Ажлын хэсгийн ахлагчаар УИХ-ын гишүүн асан Ч.Хүрэлбаатар ажиллаж байна. Мөн С.Баяр, Ц.Нямдорж, Н.Энхбаяр тэргүүтэй 16 хүн багтсан аж.

Арваннэгдүгээр сарын 15-16-ны өдрүүдэд МАН-ын 31 дүгээр Их хурлаа хийх ёстой. Их хурал хугацаандаа болно. Энэ үеэр намын дарга, бага хурлын гишүүдийн асуудлыг дүрмийн дагуу хэлэлцэх ёстой. 

Өнөөдөр намын даргын асуудлыг олон талаас нь ярилаа. Намын дүрмийн хүрээнд Бага хурлаар сонгогдсон ч Их хурлаар дахин сонгогдож яригдана. Бага хурал дээр 2/3, Их хурал дээр 50+1 гэсэн саналаар явдаг" гэв.