Монголын боловсрол, шинжлэх ухааны үйлдвэрчний эвлэлийн холбооноос багш нарын цалинг 3.5 сая төгрөгт хүргэх шаардлага тавьж, 2025 оны 10-р сарын 9-нөөс эхлэн 500 гаруй боловсролын байгууллагын 30 мянган багш, ажилтан хугацаагүй ажил хаялт зарлаад байна.

Багш, эмч нарын цалинг нэмэх ямар шийдэл гаргаж буй болон хичээл хэзээ эхлэх талаар Боловсролын сайд П.Наранбаяр өнөөдөр /2025.10.31/ сэтгүүлчдийн асуултад хариуллаа.

Тэрбээр, Монголын боловсрол, шинжлэх ухааны үйлдвэрчний эвлэлийн холбооны дарга З.Цогтгэрэлд удирдагч хүн шиг байгаач гэж хэлмээр байна. Хоёр талаас саналаа ойртуулаад, хэлсэн үгэндээ байх нь чухал.

Ерөнхий сайдтай өчигдөр уулзуулж, тохиролцоонд хүрсэн боловч өнөөдөр нөхцөл байдал хүндрэлтэй хэвээр байна.

Гэхдээ ирэх даваа гараг гэхэд сургууль, цэцэрлэгийг оруулах шаардлагатай. Монголын нийгмийн амьдралыг үүнээс илүү царцааж болохгүй шүү дээ. Хүүхдийн сурлагын хоцрогдол ноцтой үр дагаварт хүргэнэ.

Цалин нэмүүлэх багш нарын шаардлагыг маш сайн ойлгож байна. Нэмэхийг УИХ, Засгийн газрын гишүүд бүрэн дэмжиж байна. Гэхдээ бид хөнжлийнхөө хэрээр хөлөө жийх хэрэгтэй. Төсвийн хүрээндээ нийцүүлж цалин нэмэх ёстой гэдгийг ойлгох ёстой. Бид аль болох хамгийн сайн хувилбараар шийдэхийн төлөө ажиллаж байна.

-Багш нарын цалинг хэдэн хувиар нэмэх боломж байна вэ?
-30 хувиар нэмж болохоор байна. 3.5 сая төгрөг болгох хугацааг аль болох ойртуулахаар ажиллаж байна гэв. 

Засгийн газраас багш нарын үндсэн цалинг 2026 оны 1-р сараас эхлэн 20 хувь, 7-р сараас 10 хувиар нэмэх ба цалинг үе шаттай нэмэгдүүлэх замаар 2028 онд 3.5 саяд хүргэхээр төлөвлөж буйгаа танилцуулсан юм.