УИХ-ын гишүүн Б.Жаргалангийн асуулт, Оюутолгойн гэрээ байгуулсан Засгийн газрын тэргүүн Ерөнхий сайд С.Баяр дарга та, гэрээний бүх учир дутагдал нь Монгол Улсын талд ногдох 34 хувьтай холбоотой гэж ярьж байна. 34 хувийг санхүүжүүлэх хувьцааны санхүүжилт болох 1.4 тэрбум ам.долларын үндсэн зээл, хуримтлагдсан зээлийн хүү болох 800 сая ам.доллар, 2.3 тэрбум ам.долларын өрийг 2021 онд УИХ-ын 103-р тогтоолоор энэ өр тэглэгдсэн. Харин өнөөдөр яригдаж буй зээл болон Оюутолгойн зээлийн хүүгийн 18.7 тэрбум ам.доллар бол хувь нийлүүлэгчийн зээл гэсэн тусдаа зүйл. Яагаад ийм өндөр хүүтэй хөрөнгө оруулалтын зээлээр санхүүжүүлэхийг зөвшөөрсөн бэ?

УИХ-ын ийм ойлгомжгүй, хууль зөрчсөн тогтоол батлагдсан учир би тэр дагуу гэрээ байгуулсан гэж байна. Та тэр үе МАН-ын дарга байсан атал өөрийн намын бүлэг дотор улс төрийн зөвшилцөл хийж чадаагүй байна.

Оюутолгойн хөрөнгө оруулалтын гэрээг 2009 оны 10-р сарын 6-нд байгуулсан ч гэрээгээр хүчин төгөлдөр болохын өмнө 10-р сарын 28-нд өөрийн хүсэлтээр ажлаа өгсөн. Гэрээ байгуулсан юм чинь хэрэгжих нөхцөлийг бүрдүүлсний дараа Ерөнхий сайдын ажлаа өгч болоогүй юү?

25 дахь Ерөнхий сайд С.Баярын хариулт, Гэнэтийн ашгийн 68 хувийн татвар авах нөхцөл дээр гадаадын ямар ч хөрөнгө оруулагч ирэхгүй. Гэнэтийн ашиг тухайн цаг үедээ, богино хугацаанд нэлээн мөнгө хуримтлуулдаг, алс хэтдээ гадаад, дотоод бүх хөрөнгө оруулагчийг үргээдэг хууль байсан юм.

10 сарын 28-нд яагаад ажлаа өгсөн бэ? гэж байна. Хувийн эрүүл мэндийн асуудлыг гаргаад баймааргүй байна л даа. Гэхдээ нэгэнт асуусан учраас, би 2009 оны хавраас хойш Ерөнхий сайдын ажлыг эмнэлгээс хийж байсан. Манай Засгийн газрын болон УИХ-ын гишүүд, холбогдох ажлын хэсгийнхэн үүнийг сайн мэднэ.

ЗГ-ын нэг ч хурлыг би таслаагүй. Ерөнхий сайдын ажлыг чадах ядахаараа хийсэн. Ихэнх цагаа би эмнэлэгт өнгөрүүлсэн. Өрөөндөө дуслын аппараттай сууж байдаг байсныг тэр үеийн хүмүүс мэднэ. Элэг солиулах асуудал тулсан байсан.

Хөрөнгө оруулалтын гэрээ байгуулах боломж бололцоо гарсан дээр энэ гэрээг байгуулна гэж шүд зуун явсан юм. 9-р сард гэрээ байгуулагдчих болов уу гэж бодсон, 9 сардаа амжаагүй. 10 сард гэрээ байгуулагдсан. Тийм цаг үед Ерөнхий сайдын ажлаас сайн дураар татгалздаг улстөрч хаана байх вэ дээ. Миний ажил амжилттай явж байсан.

Атрын аянаас эхлээд Тавантолгой асуудал, Оюутолгойн гэрээ байгуулагдчихлаа. Үр дүнгээ харахыг бодолгүй яах вэ дээ. Хүн хүснэ, өвчин асуулгүй дайрч ирдэг эд шүү дээ. Өгсөн өргөдлийг маань 10-р сарын 28-нд УИХ-аар хэлэлцэн шийдсэн. Ажлаа өгөхдөө УИХ-ын индрээс би энэ учир шалтгаанаа тодорхой тайлбарласан гэв. 

Дахин хэлье. Хөрөнгө оруулалтын гэрээ ярьж байтал, зээлийн тухай ярих болсон. Зээл юм чинь хүүтэй байж таарна. Тухайн үед бидэнд байгаа бололцоо нь тэр. Монгол Улсын төсвийн байдал, эдийн засгийн төлөв байдлаас хамаарч зээлийн хүү тогтоно шүү дээ.