Теннисний хамгийн алдартай талбайд гайхамшиг тохиож Чехийн залуу тамирчин Маркета Вондроушова эмэгтэйчүүдийн ганцаарчилсан төрөлд урьдчилсан шатнаас оролцож түрүүлсэн анхны аварга болов.

Дэлхийн чансааны 42-т бичигддэг, Wimbledon-ы талбайд өмнө нь ганц л удаа хожиж байсан 24 настай Маркета "боломжгүй" гэж болохуйц нөхцөл байдлаас түүх бичлээ.

Финалд Тунисийн шилдэг тамирчин Онс Жабёрыг 6-4, 6-4 харьцаагаар хожсон тэрээр хагас шигшээд Украины Элина Свитолина, шөвгийн наймд АНУ-ын Жессика Пегула зэрэг шилдгүүдийг гэрт нь хариулсан юм.

Онс Жабёр нь 2022 оны Wimbledon-ы финалд Казахстаны Элена Рыбакинад хожигдож байсан билээ.

2019 оны Францын нээлттэй тэмцээний финалд шалгарснаас хойш их дуулгад шөвгөрч үзээгүй Маркета 2020 оны Токиогийн олимпоос мөнгөн медаль хүртэж байсан амжилттай.