Өнөөдөр болсон Засгийн газрын ээлжит хуралдааны шийдвэрийг танилцуулж байна.

Б.Бат-Эрдэнэ сайд дараах мэдээлэл өгөв:
-Бид допингийн эсрэг, олон улсын ВАДА (WADA) байгууллагын төлөөлөлтэй уулзлаа. Биеийн тамир спортын хуулийн шинэчилсэн найруулга бэлэн болсон. Намрын чуулганаар энэ хуулийг батална. Энэ хуульд допингийн нэг бүлэг нэмсэн. Ингэхдээ ВАДА-гаас тавьдаг шалгуурыг бүхэлд нь оруулсан. Тус байгууллагаас бидэнд үндэсний дүрмээ яаралтай батлах зөвлөмж өгснийг биелүүлэв. Мөн бидэнд ирүүлсэн, зургаан төрлийн зөрчлийг арилгахаар ажиллаж байна.  

БНСУ-ын лаборатори руу бүх төлбөрийг Засгийн газраас шилжүүлсэн. Эдгээр зөрчил бүгд шинжилгээтэй холбоотой гэв. Сэтгүүлчид Б.Бат-Эрдэнэ гишүүнээс "ОХУ-ын тамирчдыг Монгол Улсын далбаан дор Азийн наадамд оролцуулах тухай маш хариуцлагагүй зүйл ярьсан тул хариуцлага хүлээх үү" гэж асуув. 

ЗГХЭГ-ын дарга Д.Амарбаясгалан "Өмнөх дарга хувийн мэйл хаягаараа захидал илгээсэн, эсэхийг тогтоох шалгалт үргэлжилж байна. Допингийн эсрэг үндэсний төвийг олон нийтэд нээлттэй байгууллага болгоно. Манай улс ВАДА-гаас тогтоодог зэрэглэлээр 3-аас 2 руу оржээ. Манай тамирчид өндөр амжилт үзүүлэх хэрээр бидэнд тавьдаг шалгуур өндөрсөв. Ирэх зуны олимпт манай тамирчид амжилттай оролцоно гэж найдаж байна. ВАДА манай талд ямар шалгуур тавьж байгааг бид мэдэхгүй байв. Засгийн газар Допингийн эсрэг үндэсний  төвөө дэмжин ажиллана" гэв.

Б.Бат-Эрдэнэ сайд: ОХУ-ын тамирчдыг Монгол Улсын нэрээр Азийн наадамд оролцуулах тухай би огт яриагүй. Та буруу мэдээлэл авчээ. Би өөрөө тамирчин хүн учраас легионэр тамирчдыг ч Монгол Улсын нэрээр олон улсын тэмцээнд оролцуулахыг дэмждэггүй. Үүнийгээ ч ил тод хэлдэг. Ер нь манай улсын допингийн асуудал олон жил  ужгирсан. Б.Чинзоригтой холбоотой асуудлаар би Боксын холбооны санхүүжилтийг зогсоохоор албан бичиг илгээгээд байна. Төрөөс буюу татвар төлөгчдийн мөнгөөр допингийн асуудал гаргасан спортын холбоог дэмжихгүй.

Азийн наадамд оролцсон, хүндийг өргөлтийн тамирчнаас мөн допинг илэрсэн гэв.