ДХИС-ын офицерын дамжаанд суухаар орон нутгаас Улаанбаатарт ирсэн цагдаа нар бэлэн байдал зарласантай холбоотойгоор өглөө оройн ээлжид өдөрт найман цагаар үүрэг гүйцэтгэж байна. Хамаатан садан эсвэл таньдаг айлдаа байрлаж байсан тэдний зарим нь хонох газаргүй болж байгаа талаар бидэнд мэдээллээ.

Одоогоор ийм нөхцөлд байгаа талаар мэдээлсэн 10 орчим хүн байгаа бөгөөд үүрэг гүйцэтгүүлэх шалтгаанаар орон нутаг руу нь буцаахгүй, орон байраар хангахгүй байгаа аж. 

ДХИС-ын офицерын дамжаанд суралцахаар ирсэн хүмүүсийн 60-70 хувь нь орон нутагт амьдардаг, өмнө нь энгийн иргэн байсан алба хаагчид бөгөөд аравдугаар сард ирсэн тул хангалттай дулаан хувцасгүй байгаа гэв.

нялх хүүхэдтэй айлд байрлаж байгаагаас гадна ажил шөнө 01-02 цагийн үед тардаг тул тухайн айлдаа хүндрэл учруулж байна. Бид ч өөрсдөө эрсдэлтэй бүлгийн хүмүүс

Алба хаагч С "Цаанаас байр хоол өгөхгүй байгаа тул бид өөрсдөө хамаатан садан, таньдаг айлаа бараадаж байна. Гэвч нялх хүүхэдтэй айлд байрлаж байгаагаас гадна ажил шөнө 01-02 цагийн үед тардаг тул тухайн айлдаа хүндрэл учруулж байна. Бид ч өөрсдөө эрсдэлтэй бүлгийн хүмүүс. Холбогдох орон нутгийн даргадаа мэдэгдэхээр уг шийдвэр, тушаалыг ЦЕГ-аас гаргасан гэх хариуг өгч буй ба хаана, хэзээ ямар үүрэг гүйцэтгэх талаар ямар хүн тушаал өгч, зохицуулж байгаа нь мэдэгдэхгүй байна" гэв.

Мөн ДХИС-ийн эчнээ ангид цолоо дээшлүүлэхээр ирсэн 200 гаруй орон нутгийн ахлагчид байгаа бөгөөд үндсэн цалин дээр цолны нэмэгдлээ авч байгаа аж. Онцгой нэмэгдлийн 20 хувийн цалин нэмж орох ёстой ч сургалтад сууж байгаа гэдэг шалтгаанаар өгөөгүй гэж алба хаагч А хэллээ. Тэрээр мөн "Гол нь ажиллахгүй гэсэн үг биш. Хоол унд, тухтай гэр оронтой гэртээ, орон нутагтаа очиж үүргээ гүйцэтгэх хүсэлтэй байна" хэмээв.

Гол нь ажиллахгүй гэсэн үг биш. Хоол унд, тухтай гэр оронтой гэртээ, орон нутагтаа очиж үүргээ гүйцэтгэх хүсэлтэй байна

Мөн арваннэгдүгээр сарын 11-нээс ажиллаж эхэлсэн алба хаагч Х "Би одоогоор нялх хүүхэдтэй айлд байрлаж буй. Хэдий эрсдэлт бүлгийн алба хаагч ч гэсэн цаанаас халдвараас хамгаалах тусгай хувцас хэрэглэл өгөөгүй, албаны өвлийн хувцастай ажиллаж байна. Өдөрт найман цагаар ажиллаж байгаа ба ажиллах хугацаанд нэг удаа хоол өгч байна" хэмээв.

Энэ талаар ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүүгээс тодруулахад "Тухайн дамжааныхан бүгд цолоо авч ажилд томилогдсон гэсэн. Бүх нийтийн бэлэн байдал дуусах хүртэл хугацаанд үүрэг гүйцэтгэнэ. Бид чинь тангараг өргөсөн хүмүүс шүү дээ" хэмээсэн юм.