АҮЭБ-ийн сайд Г.Дамдинням албан томилолтын хүрээнд ОХУ-ын Эрчим хүчний сайд С.Е.Цивилёв, Эрчим хүчний дэд сайд П.Ю.Сорокин нартай Москва хотноо уулзжээ.

Тэд газрын тосны бүтээгдэхүүнийг урт хугацаанд, тогтвортой нийлүүлэхэд гарсан бэрхшээлийг хэрхэн шийдэх талаар харилцан тохиролцлоо. 

Уулзалтаар шатахуун нийлүүлэх явцад гарсан хүндрэлийг давтахгүй байх, энэ онд нийлүүлэлтийг хэрхэн тогтвортой хангах талаар ажил хэргийн саналуудыг хэлэлцэж, цаашдын төлөвлөлт, уялдаа холбоог хангах ажлыг хоёр яам цахимаар тогтмол ярилцаж, шуурхай шийдэж байхаар тохирлоо. 

ОХУ-ын талаас энэ онд Монголд нийлүүлэх шатахууныг хэвийн, тасралтгүй нийлүүлэх боломжтой гэв. Өөрийн экспортлогч ААН-үүдийн төлөвлөгөөнд Монголын захиалгыг эрт оруулж, төлөвлөх боломжоор ханган, нийлүүлэлтийг хэвийн байлгах боломжтой гэдгээ илэрхийллээ.

Мөн ОХУ-ын нутаг дэвсгэрт, Монголын хилтэй ойр бүсэд шатахууны агуулахыг манай дотоодод хадгалах савны нөөц бүрдтэл түр хугацаанд түрээслэн нөөц бүрдүүлэхэд хамтарч ажиллана.

Цаашид ОХУ-ын үйлдвэрүүдээс ачихаас эхлэн Монгол хэрэглэгчийн машинд цэнэглэх хүртэлх бүх дамжлагыг удирдан шийдэх удирдлага, зохион байгуулалтын нэгдсэн “эко систем”-ийг хамтран бий болгох боломжийг судалж, холбогдох шийдвэр гаргах талаар ярилцав.

Сайд Г. Дамдинням сүүлийн саруудад үүссэн шатахууны хомстолыг даван гарахад хамтран ажиллаж, тус яамнаас шуурхай удирдлагаар дэмжлэг үзүүлж байсанд талархал илэрхийлэв.

ОХУ-ын Эрчим хүчний сайд С.Е.Цивилёв манай улсад нийлүүлж буй газрын тосны бүтээгдэхүүнийг цаашид тогтвортой нийлүүлэх, энэ салбарт хамтран ажиллах тухай хоёр улсын Засгийн газар хоорондын хэлэлцээрээр хүлээсэн үүргээ бүрэн хэрэгжүүлж, бүх талаар дэмжин ажиллахаа илэрхийллээ.

Уулзалтад “Газпром”, “Роснефть”, "Нефтьхимисервис", "Татнефть", "Оросын төмөр зам" компаниудын төлөөлөл, холбогдох байгууллагуудын төлөөлөл оролцов гэж АҮЭБЯ мэдээлэв.