Эрчим хүчний салбарт доголдол үүсээд буй энэ үед салбарыг хөгжүүлэхэд чөдөр тушаа болсон салбарын үе үеийн удирдах албан тушаалтнуудыг буруутгасан мэдээлэл цахим орчинд түгэж байна. Тэдний нэг нь Эрчим хүчний сайдаар ажиллаж байсан, УИХ-ын гишүүн Ц.Даваасүрэн бөгөөд түүнийг сайд байхдаа ДЦС-5-ыг барих ажлыг гацаасан гэж буруутгажээ. 

УИХ-ын гишүүн Ц.Даваасүрэн энэ асуудалтай холбогдуулан өнөөдөр цахим хуудсаар дамжуулан хариулт өгсөн байна.

Тэрбээр, ДЦС-5-ыг барих ажлыг УИХ-ын гишүүн Даваасүрэн Эрчим хүчний сайдаар ажиллаж байхдаа гацаасан гэж энэ салбарын инженер Р.Ганжуур гэж хүн ярьжээ. ДЦС-5-ыг барих ажлыг газрын асуудлаас нь болж шийдэхгүй байх байр суурийг тухайн үеийн сайд  нар нь баримталж байсан юм билээ. Эхлээд ТЭЦ-3-ын хажууд газар өгч, дараа нь Хонхорт, эцэстээ Багануурын ДЦС болж хувирсан юм билээ. Миний сайд байх үед энэ асуудал огт яригдаагүй.

Хэрэв миний сайд байх үед энэ асуудал яригдаж, би ДЦС-5-ыг барих ажлыг хойшлуулах шийдвэр гаргасан бол хариуцлага хүлээж УИХ-ын гишүүнээс огцроход бэлэн байна. Р.Ганжуур та тийм баримт аваад ир. Авчирч чадахгүй бол би таныг шүүхэд өгөх болно.

Багануурын цахилгаан станцыг гацаах шийдвэр би бас огт  гаргаж байгаагүй. Тухайн үед ҮАБЗ-өөс Багануурын цахилгаан станцыг явуулахгүй байх шийдвэр гарсан байсан. Тийм бичиг Эрчим хүчний яаманд ирсэн. Тэр бичгийг би та бүхэнд харуулж болно. Гэхдээ эрчим хүчний систем хүнд байгаа учир би Багануурын цахилгаан станцын төслийг зогсоогоогүй, энэ төсөл үргэлжилж байсан.

Харин сүүлд 2021 онд намайг сайдын ажлыг өгсний дараа БНХАУ-ын дарга Ши Жинпинь  НҮБ-д нүүрсний станцуудын төслийг санхүүжүүлэхгүй байх үүрэг хүлээсэн учир энэ төсөл зогссон. Энд манайхаас шалтгаалсан зүйл байхгүй. Баганууртай холбоотой надаас болж төсөл зогссон ямар нэг баримт гаргаж ирвэл би мөн огцоръё. Бусдыг ингэж гүтгэж болохгүй.