Ерөнхий сайд Г.Занданшатар Засгийн газрын гишүүн, Тэргүүн Шадар сайд бөгөөд Эдийн засаг, хөгжлийн сайдаар Ж.Энхбаярыг, Засгийн газрын гишүүн, ХХААХҮ-ийн сайдаар М.Бадамсүрэнг томилох тухай захирамжид гарын үсэг зурлаа. 

Тэрбээр "Монгол Улсын Ерөнхий сайдын бүрэн эрхийн хүрээнд дээрх томилгоог хийн батламжилж байна. Засгийн газар хөгжлийн таван жилийн үндсэн чиглэлээ УИХ-д өргөн мэдүүлэн хэлэлцэгдэж байна. 

Үүний үндсэн зорилгын нэг нь эдийн засгаа төрөлжүүлэх, солонгоруулах явдал юм. Уул уурхайгаас хэт хамааралтай байгаа эдийн засгийнхаа тулгуур болох хөдөө аж ахуй, аялал жуулчлал тэргүүтэй бусад салбарыг хөгжүүлж олон тулгууртай болох нь тогтвортой хөгжлийн үндэс. 

Ийм учраас эдийн засгийн бодлого, хөдөө аж ахуйн бодлого уялдаж ажиллах зорилгоор Тэргүүн Шадар сайд бөгөөд Эдийн засаг, хөгжлийн сайдаар Ж.Энхбаярыг ХХААХҮ-ийн сайдаар аймаг, орон нутагт олон жил ажилласан туршлагыг нь харгалзаж үзэж М.Бадамсүрэнг томилж байна" гэлээ.