Гадаад харилцааны яамны Төрийн нарийн бичгийн дарга Л.Мөнхтүшиг Бүгд Найрамдах Польш Улсаас Монгол Улсад суугаа Элчин сайд Кшыштоф Бойког эх орондоо бүрмөсөн буцаж байгаатай нь холбогдуулан хүлээн авч уулзав.

Уулзалтын үеэр Төрийн нарийн бичгийн дарга Л.Мөнхтүшиг Монгол Улсын “гуравдагч хөрш” Польш Улстай хөгжүүлж буй харилцаа, хамтын ажиллагаа хоёр талын хүч чармайлтын дүнд сүүлийн жилүүдэд нийгэм, эдийн засгийн олон салбарт өргөжин гүнзгийрч, харилцааны түвшнийг ахиулан “Иж бүрэн түншлэл”-ийн түвшинд хүргэснийг тэмдэглэв. 

Мөн Монгол, Польшийн харилцааг хөгжүүлэхэд чухал хувь нэмэр оруулан идэвх зүтгэл гарган ажилласан Элчин сайд К.Бойкод талархал илэрхийлэн Гадаад харилцааны яамны “Алтан гэрэгэ”-г гардуулж, цаашдын ажил үйлсэд нь амжилт хүсэв.

Элчин сайд К.Бойко албан үүргээ гүйцэтгэх хугацаанд Монгол Улсын төр засаг, Гадаад харилцааны яамны зүгээс бүхий л талаар дэмжлэг үзүүлж ирсэнд талархал илэрхийлэв.

Эх сурвалж: ГХЯ