УИХ-ын гишүүн Т.Мөнхсайхан УИХ-д Сургуулийн орчны эрүүл мэнд, аюулгүй байдлын тухай хуулийн төслийг 2025 оны арванхоёрдугаар сард өргөн мэдүүлсэн. 

Энэ төсөлд  эрүүл мэндийн баг ажиллуулах талаар тусгаснаар  суралцагчдын бие, сэтгэл зүй, нийгмийн аюулгүй байдлыг цогцоор нь хамгаална гэж хууль санаачлагч тодотголоо.  

Эрүүл мэндийн багт эцэг эхийн төлөөлөл, багш, сэтгэл зүйч, нийгмийн ажилтан, суралцагчийн төлөөлөл оролцох юм байна. Ингэснээр сургуулийн орчинд үүсдэг асуудлыг олон талын оролцоотойгоор шийдвэрлэх боломжийг бүрдүүлнэ. 

Тодруулбал, сүүлийн жилүүдэд дэлхий дахинд төдийгүй манай улсад анхаарал татаж буй үе тэнгийн дээрэлхэлтийг шийдэхэд энэ бүтэц онцгой ач холбогдолтой гэв. 

Үе тэнгийн дээрэлхэлт нь зөвхөн нэг сурагчийн зан үйл бус, сургуулийн орчны соёл, харилцаа, хяналт, дэмжлэгийн тогтолцоотой шууд холбоотой.

Иймээс зөвхөн сахилгын арга хэмжээ авах бус, эрт илрүүлэх, урьдчилан сэргийлэх, сэтгэл зүйн дэмжлэг үзүүлэх, гэр бүл-сургууль-суралцагчийн хамтын ажиллагааг бий болгох шаардлагатай.
 
Өөрөөр хэлбэл, сургуулийн эрүүл мэндийн баг нь зөвхөн эрүүл мэндийн үйлчилгээний бүтэц бус, хүүхэд бүр айдасгүй, хүндэтгэлтэй орчинд суралцах нөхцөлийг бүрдүүлэх хамгаалалтын тогтолцоо байхаар хууль боловсруулжээ.

Энэ заалтыг бодитоор хэрэгжүүлбэл сургуулийн орчинд үүсдэг үе тэнгийн дээрэлхэлт, ялгаварлан гадуурхалт, сэтгэл зүйн дарамтыг бууруулж, суралцагчдын аюулгүй, эрүүл сургалтын орчныг бүрдүүлэх чухал суурь болно гэв.