Хөл бөмбөгийн ДАШТ-ий хагас шигшээд Англи болон Аргентины шигшээ багууд таарч тоглосон бөгөөд Аргентин 2:1 гэсэн тооны харьцаагаар өрсөлдөгчөө буулгаж авсан.

1982 онд болсон Фолклендийн дайны улмаас ДАШТ дэх энэ хоёр улсын учраа бүр дэлхий нийтийн анхаарлын төвд байсаар ирсэн. 

Өнгөрсөн шөнийн тоглолт ч мөн ширүүхэн уур амьсгалтайгаар эхэлсэн. Аргентин хожигдож явсан ч дараалсан хоёр гоолоор ялалт байгуулж, аваргын төлөө шалгараад буй. 

Тэд ялалтын баяраа тэмдэглэх үеэр цэнгэлдэхийн талбайд "Las Malvinas son Argentinas" буюу "Мальвины арлууд Аргентиных" гэсэн бичигтэй туг өргөжээ. 

Аргентины тал Мальвины арлууд гэж нэрлэдэг энэ Фолклендийн арлууд нь Их Британи, Аргентины хооронд маргаантай хэвээр байдаг газар нутаг юм.

Хоёр улс 1982 онд 74 хоногийн турш энэ арлуудын төлөө дайтсан. Уг мөргөлдөөний үеэр Аргентины 655, Их Британийн 255 цэрэг амиа алдсан бөгөөд арлуудын гурван оршин суугч мөн амь үрэгджээ.

Тоглолтын өмнө Аргентины шигшээ багийн дасгалжуулагч Лионель Скалони улс төр, хөл бөмбөгийг хольж болохгүй гэсэн байр сууриа илэрхийлсэн. 

Харин тоглолтын дараа Аргентины дэд ерөнхийлөгч цахим хуудастаа "Энэ бол жирийн нэг тоглолт биш. Мальвины арлууд Аргентиных. Цэнгэлдэхэд авчрахыг хориглосон ч бид зүрх сэтгэлдээ тээж явдаг" хэмээн нийтэлжээ. 

2014 онд Словенийн эсрэг нөхөрсөг тоглолтын өмнө Аргентины тоглогчид ижил агуулгатай туг дэлгэсэнтэй холбоотойгоор Аргентины хөл бөмбөгийн холбоог 20 мянган фунт стерлингээр торгож байсан.

Тус үйлдлийг нь улс төрийн шинжтэй, багийн ёс зүйн дүрэм зөрчсөн гэж үзэж байв.

Эх сурвалж: ВВС