Монголын нийт багш нарын төлөөлөл цалингаа нэмүүлэхийг шаардаж өнөөдөр төв талбайд жагслаа. Тэд албан ёсны шаардлагаа хүргүүлээд төрийн ордныг тойрон алхсан юм. 

МҮЭХолбооны Ерөнхийлөгч Э.Тамир:
- Салбарын ажилтнуудын цалин хөлсийг 30-аас доошгүй хувиар нэмэгдүүлэх ёстой. Харамсалтай нь Засгийн газраас УИХ-д өргөн барьсан төсвийн төсөлд нь нэмэгдлийн талаар тусгагдаагүй. Цалингийн төсөв жаахан ч нэмэгдээгүй, өөрчлөлт ороогүй гэсэн үг. Багш, ажилтнуудын цалингийн нэмэгдэл байхгүй.  Мөн салбарт цомхотгол хийхээр болсон. Багшин үндсэн цалин 1 сая 480 мянган төгрөг. Багш мэргэжил эзэмшээд төгссөн ч мэргэжлээрээ ажиллахгүй байдал ихэссэн. Багш нарын хөдөлмөрийн үнэлэмжийг нэмэгдүүлэхгүй бол боловсролын салбар маш хүнд нөхцөл байдалд нэгэнт орсон. 

Хөдөлмөрийн хуулиар бол одоо "Сонирхлын маргаан" эхлээд явж байна. Зуучлагч томилуулах хүсэлтээ бид явуулсан ч Боловсролын яам хүлээн аваагүй, одоо Хөдөлмөрийн яамнаас зуучлагч томилж өгөх ёстой. Хэрэв энэ асуудлыг шийдвэрлэж чадахгүй байх юм бол багш нар шаардлагын дараагийн арга хэмжээгээ ажил хаялт хэлбэр рүү шилжүүлнэ гэлээ. 

Хүүхдүүдийн суралцах эрх ноцтойгоор зөрчигдөх эрсдэл улам нэмэгдэхийн хэрээр багшлах боловсон хүчний дутагдал улам ихсэж сургалтын чанарт ихээр нөлөөлж, нөхцөл байдал улам хүндэрч, боловсролын салбарын тогтвортой хөгжлийг алдагдуулах аюулд хүргэж байна. Засгийн газар, Боловсролын яаманд дээр дурдсан асуудлыг шийдвэрлүүлэхээр удаа дараа шаардлага хүргүүлсэн ч үр дүн гарахгүй байна. Иймд жагсаалыг зохион байгуулж, мөн үр дүн гарахгүй бол ажил хаялт зарлахаа тэд мэдэгдлээ.