Даваа гарагт Москва хотод автомашинд тавьсан тэсрэх бөмбөг дэлбэрсний улмаас Оросын генерал амь үрэгджээ.

Энэ нь сүүлийн жил гаруй хугацаанд өндөр албан тушаал бүхий цэргийн албан хаагч ийм байдлаар амиа алдсан гурав дахь тохиолдол боллоо. 

Мөрдөн шалгах байгууллагынхан шалгалтын хүрээнд олон хувилбарыг гаргаж ирсэн бөгөөд түүний нэг нь Украины талаас уг халдлагыг үйлдсэн байж болзошгүй юм. 

Амиа алдсан генерал нь Зэвсэгт хүчний жанжин штабын сургалтын газрын дарга, 56 настай Фанил Сарваров гэж хүн байсан гэв.

Дайн эхэлснээс хойш ОХУ-ын эрх баригчид дотоодын цэргийн албан хаагчид болон олон нийтийн зүтгэлтнүүдийн эсрэг үйлдсэн хэд хэдэн халдлагад Киевийг буруутгаж ирсэн. 

Украины талаас зарим халдлагад оролцсон гэдгээ хүлээн зөвшөөрч байсан ч даваа гарагт болсон энэ хэргийн талаар одоогоор тайлбар хийгээгүй байна.

Кремлийн хэвлэлийн төлөөлөгч Дмитрий Песков ерөнхийлөгч Владимир Путинд Сарваровын амь үрэгдсэн тухай мэдээллийг нэн даруй хүргэсэн гэв.

Амиа алдсан генерал нь Чеченьд байлдаж байсан бөгөөд ОХУ-аас Сирид явуулсан цэргийн ажиллагаанд мөн оролцсон аж. 

Жил гаруйн өмнө мөн Оросын генерал Игорь Кириллов орон сууцныхаа гадна цахилгаан скүүтерт нуусан тэсрэх бөмбөгт өртөн амиа алдсан юм.

Уг хэргийг Украины аюулгүй байдлын албаны захиалгаар үйлдсэн хэмээн Узбекистаны нэгэн иргэнийг баривчилж, ял оноосон. 

Эх сурвалж: АР