“Хүннү” болон “Номад” бондын өгөөж сүүлийн нэг жилийн хугацаанд буурсан трендтэй байна.

Олон улсын үнэлгээний “Fitch Ratings” болон “S&P Global Ratings” агентлаг Монгол Улсын шинээр гаргахаар төлөвлөж буй бондод "B+" үнэлгээ өглөө. Хэдий тийм боловч Монгол Улс эдийн засгийн болон төсвийн тэлэх бодлоготой байгаа энэ үед гадаад эрсдэл нэмэгдэж, санхүүжилтийн урсгал татрах нь шинэ бондын зэрэглэл дагаад буурахад хүргэж магадгүй байгааг анхааруулав.

Мөн стратегийн уул уурхайн төслүүдийн үйл ажиллагаа тасалдахуйц бодлогын гэнэтийн өөрчлөлт нь сөргөөр нөлөөлөх эрсдэлтэй байна.

Монгол Улсын Засгийн газар 2026 онд хугацаа нь дуусах 566 сая ам.долларын “Номад” болон 2028 онд хугацаа нь дуусах 650 сая ам.долларын “Хүннү” бондыг худалдан авах тендер зарласны дараа эдгээр бондын ханш өсөж, 2022 оны аравдугаар сараас хойших дээд түвшинд хүрч, тогтворжсон үзүүлэлттэй байна.

Харин АНУ-ын Төв банк бодлогын хүүгээ бууруулж эхлэхтэй зэрэгцээд бондуудын өгөөж сүүлийн нэг жилийн хугацаанд тасралтгүй буурчээ.

Сүүлийн байдлаар "Хүннү" бондын өгөөж 5.05 хувь, "Номад" бондын өгөөж 6.28 хувьтай байна.

Т.Тэргэл