Монгол Улс, Бүгд Найрамдах Чех Улсын хооронд дипломат харилцаа тогтоосны 75 жилийн ойн хүрээнд Чингис хаан Үндэсний музей, Чехийн Үндэсний музейтэй хамтран “Чингис хаан” (Chinggis khaan) олон улсын үзэсгэлэнг Чех улсын Прага хотноо 2025 оны 3-р сарын 10-ны өдрөөс 6-р сарын 22-ны өдрүүдэд Чехийн Үндэсний музейн “Historical building”-ийн үзэсгэлэнгийн танхимд дэлгэн үзүүлэхэд бэлэн болжээ. 

Энэхүү үзэсгэлэнд Монгол Улсаас Чингис хаан Үндэсний музей болон ШУА-ийн харьяа Археологийн хүрээлэнгийн нийт 170 дэсийн 698 ширхэг үзмэр, эд өлгийн зүйлийг дэлгэнэ. 

Чингис хаан Үндэсний музей нь олон улсын хилээр чөлөөтэй нэвтрэх тусгай эрх бүхий, тусгай ариутгал хийгдсэн зориулалтын сав, хүчил шүлтгүй тусгай баглаа боодлыг тухайн үзмэрийн хэмжээнд тааруулан БНСУ-д захиалан хийлгэж, үзмэрүүдийг музейд буцааж авчрах хүртэл хариуцах олон улсын даатгал хийлгэжээ. 

Үзмэр эд өлгийн зүйлийг гааль, цагдаа, тагнуул, салбарын хяналт дор Монгол Улсын “Соёлын биет өвийг зөөж тээвэрлэх журам”-ыг баримтлан зөөж тээвэрлэсэн байна. 

Чингис хаан Үндэсний музейн захирал, академич С.Чулуун, БНЧУ-ын Үндэсний музейн ерөнхий захирал Михал Лукеш нар 2024 оны зургаадугаар сард Улаанбаатар хотноо Үзэсгэлэн зохион байгуулах, уг үзэсгэлэнд үзмэр оролцуулах талаар хамтран ажиллах гэрээ байгуулж, гарын үсэг зурсан юм.