Өнгөрсөн оны эрэмбэд Сингапур Хонконгийн өмнө бичигдэж байв.

Дэлхийн санхүүгийн төв болсон хотуудыг эрэмбэлсэн 2024 оны индекст Хонконг Сингапурыг гүйцэж, Азийн тэргүүлэх санхүүгийн төвийн байр сууриа эргүүлэн авчээ.

Харин дэлхийн хэмжээнд Хонконг Нью-Йорк болон Лондоны дараа гуравдугаарт эрэмбэлэгдсэнийг Z/Yen Partners болон БНХАУ-ын Хөгжлийн хүрээлэнгийн судлаачдын Даваа гарагт танилцуулсан индекс харуулж байна. Санхүүгийн үйлчилгээ үзүүлдэг олон мянган мэргэжилтний дунд явуулсан судалгаанд үндэслэн дэлхийн санхүүгийн төвд тооцогддог 121 хотыг тус индекст эрэмбэлжээ.

Цар тахлын хорио хязгаарлалтад туйлдаж, багагүй хэмжээний ажиллах хүчээ алдаад байгаа Хонконгийн санхүүгийн салбарт энэ нь тун таатай мэдээ болж байна. Харин тус хотын үл хөдлөх хөрөнгийн салбар хараахан сэргэж чадаагүй бөгөөд зах зээлийн идэвхжил, хэрэглэгчийн эрэлт сул хэвээр байна.

Энэ оны индекст гарсан онцлох өөрчлөлтүүдээс дурдвал:

БНХАУ-ын Шэньжэнь хот финтек салбарын чансаагаар Сан-Франциског гүйцэж гуравдугаарт эрэмбэлэгдсэн.
Ерөнхий эрэмбэд Чикаго, Лос-Анжелес хотууд Шанхайг гүйцэж, зургаадугаар болон долоодугаар байрт тус тус бичигдэв.
Сидней, Наньжин, Тяньжин хотууд бүгд 10-аас дээш байр ухарсан. Судалгаанд оролцогсдын 20 гаруй хувь нь геополитикийн эрсдэлийг хамгийн том сорилт гэж үзжээ.

Дэлхийн топ 20 санхүүгийн төв:

• Нью-Йорк
• Лондон
• Хонконг
• Сингапур
• Сан-Франциско
• Чикаго
• Лос-Анжелес
• Шанхай
• Шэньжэнь
• Франкфурт
• Сөүл
• Вашингтон
• Женев
• Дублин
• Парис
• Дубай
• Цюрих
• Бээжин
• Люксембург
• Токио