Трамп өөрийг нь алахыг оролдсон хэргийн талаар анх удаа олон нийтэд нээлттэй ам нээжээ.

Бүгд найрамдах намаас ерөнхийлөгчийн сонгуульд нэр дэвшсэн тэрээр өнгөрсөн бямба гаригт аминд нь халдах оролдлого хэрхэн болсон талаар ярьсан байна.

Тэрбээр аллагын оролдлогоос азаар амьд гарсан үйл явдлыг тайлбарлахдаа "Бурхан миний талд байсан" гэжээ.

Чихээ боосон, 78 настай ерөнхийлөгч асан индэр дээр үг хэлэхдээ "Би та бүхэнд тэр үед юу мэдэрснээ хуваалцмаар байна. Гэхдээ энэ бол энэ талаарх эхний бөгөөд сүүлчийн яриа байх болно. Учир нь үүнийг ярих нь миний сэтгэлийг өвтгөж байна. Сум миний амийг хөнөөхөд дөрөвний нэг инчийн ямх зайнд зөрсөн. Би чанга дуу гарах чимээ сонсоод баруун чихэнд минь ямар нэг зүйл үнэхээр хүчтэй цохихыг мэдэрсэн. Тэгээд "Хөөх, саяных юу байсан бэ?" гэж бодуут “Сум л зөвхөн ингэж сонсогдоно” гэж өөртөө хэлээд баруун гараа чихэндээ ойртуулан доошлуулахад гар минь цус болсон байсан” гэжээ.

Тэрбээр цааш үргэлжлүүлэн “Нууц албаны маш зоригтой ажилтнууд маань тайзан дээр гүйж ирэн намайг хамгаалахаар миний дээрээс бүслэхэд сумнууд шунгинан ниссээр байлаа. Хаа сайгүй цус асгарч байсан ч миний талд бурхан байсан болохоор би маш аюулгүй байдлыг мэдэрсэн. Гайхалтай нь алуурчин гохоо дарахаас өмнө би толгойгоо хөдөлгөөгүй байсан бол сум яг онож, өнөө орой энд байхгүй байх байсан” гэжээ.

Эх сурвалж: BBC