Нүүрсний хулгайд холбогдсон эрх мэдэл, албан тушаалтнуудыг илрүүлэн шалгах ажлын хэсэг шалгалтын үйл ажиллагааныхаа явцын талаар өдөр бүр 11.00 цагаас мэдээлэл өгч байхаар болсон.

ЗГХЭГ-ын дарга Д.Амарбаясгалан өнөөдрийн ээлжит мэдээллийнхээ үеэр, Иргэдийн жагсаал, үүсээд буй нөхцөл байдалтай холбоотой Засгийн газрын ээлжит бус хуралдаан өнөөдөр боллоо.

Бидний нэрлэж заншсанаар жижиг Тавантолгой буюу орон нутгийн өмчлөлийн  хувь, хувийн өмчлөлд 49 хувь нь шилжсэн сүүлийн 10 гаруй жилд ажиллаж байгаа уул уурхайн компани бий. Энэ уул уурхайн компаниас өнөөдрийг хүртэл Монголын төрд, ард түмэнд өгсөн өгөөж огт байдаггүй. 10 гаруй жилд явуулсан үйл ажиллагаагаараа Өмнөговь аймгийн бүтээн байгуулалтын ажилд хувь нэмэр оруулдаг гэсэн тайлбар өгч ирсэн.

Харамсалтай нь энэ компани сүүлийн өдрүүдэд яригдаж байгаа хоосон машин хилээр гарсан нэрээр, дээр нь ЭТТ-иас алдагдсан мөргөцөгийн асуудал зэрэгтэй холбогдсон асуудал үүсэж байна. Тийм учраас Засгийн газраас өнөөдөр 1991 оны дөрөвдүгээр сард Монгол Улсын Засгийн газарт эрх олгогдсон байдаг хуулийн заалтаар бүрэн эрхт төлөөлөгч томилох шийдвэр гаргасан.

Бүрэн эрхт төлөөлөгч нь зургаан сарын хугацаанд томилогдон ажиллаж, хоосон гарсан гэж мэдүүлээд нүүрс тээвэрлэсэн байж болзошгүй зөрчлүүд, мөн ЭТТ-н алдагдсан нүүрсний хулгайтай холбоотой асуудлыг нэр мөр шийдвэрлэх үүднээс ХЗДХЯ-ны Төрийн нарийн бичгийн дарга П.Сайнзоригийг Бүрэн эрхт төлөөлөгчийн албыг хавсран гүйцэтгүүлэхээр томиллоо.

Шадар сайдаар ахлуулсан баг өнөөдөр Өмнөговь аймагт очиж ажлыг хүлээлцүүлэх, тухайн ААН-д бүрэн эрхт төлөөлөгч ажиллах боломж олгох шийдвэр гаргасан гэв.