Парис-2024 олимпын наадмын боксын төрөлд 66 кг-ийн жинд өрсөлдсөн Алжирын тамирчин Иман Хелиф олимпын алтан медальтан боллоо.

Түүний хувьд хүйсийн асуудлаар олон нийтийн шүүмжлэлд ихээхэн өртсөн юм. Тэрбээр алтан медалийн төлөөх тулаанд Хятадын улсын тамирчин Ян Люг ялжээ.

Тэрбээр ВВС-д өгсөн ярилцлагадаа “Энэ бол миний мөрөөдөл. Би үнэхээр баяртай байна. Энэ бол миний найман жилийн хөдөлмөр. Алжирчууддаа баярлалаа гэж хэлмээр байна. Би бол хүчтэй эмэгтэй” гэсэн байна.

25 настай түүний хувьд өнгөрсөн жилийн Дэлхийн аварга шалгаруулах тэмцээнд бие махбодын шалгуур үзүүлэлтийн шинжилгээгээр тестостероны хэмжээ өндөр гэж гарсан тул тэмцээнд оролцох эрхгүй болж байв. 

Энэ удаагийн олимпын наадамд Хелифт оролцох эрх олгосныг Олон улсын олимпын хорооноос мэдэгдсэн. Үүний дараа шударга бус өрсөлдөөн гаргалаа хэмээн олон хүн шүүмжлэлтэй хандсан.

Тэрбээр багаасаа боксоор хичээллэж буй бөгөөд 2019 оны эмэгтэйчүүдийн боксын ДАШТ, 2020 оны Токиогийн олимпод тус тус оролцож байсан юм. 

Хелифтэй ижил шалтгаанаар өнгөрсөн жилийн ДАШТ-ээс хасагдаж байсан Тайванийн тамирчин Лин Ю-Тин өнөөдөр алтан медалийн төлөө тулалдана. 

Эх сурвалж: ВВС