#Жүдо Монголын шигшээ баг 2025 оны эхний медалиа дөрөв дэх тэмцээнээсээ авлаа.

Олон Улсын жүдо бөхийн холбоо буюу IJF-ээс зохиодог цуврал их дуулга тэмцээний нэг, 2025 оны дөрөв дэх их дуулга "Tbilisi Grand Slam 2025" Гүрж улсад эхэллээ.

Тэмцээний эхний өдөр хөнгөн таван жингийн барилдаан болж Монголын 9 бөх барилдсанаас эмэгтэй -48 кг жинд Ганбаатарын Наранцэцэг алтан медаль авлаа.

Өмнөд Солонгосын Мио Хух, Испанийн Лаура Мартинез Абеленда, Францын Ширин Букли нарыг ялсан тэрээр финалд Испанийн Эва Перез Солерыг ялж энэ оны анхны медалиа хүртэв.

• Тбилисийн их дуулгад Монголын 20 жүдоч барилдана

Өнгөрсөн шөнө эрэгтэй -60 кг жинд Энхтайваны Ариунболд хүрэл медалийн төлөө Нидерландын Эмиэл Жарингд ялагдаж 5-р байр, -57 кг жинд Мөнхцэдэвийн Ичинхорлоо хүрэл медалийн төлөө Сербийн Мариса Перишичэд ялагдаж мөн 5-р байр эзэлсэн. Харин -52 кг жинд Мягмарсүрэнгийн Нандин-Эрдэнэ дагах барилдаанд Унгарын Река Папд ялагдаж 7-р байр эзлэв.

Өнөөдөр дунд дөрвөн жингийн барилдаанууд болох ба Монголын шигшээ багаас

• -73 кг. Одгэрэлийн Уранбаяр
• -73 кг. Лавжаргалын Анхзаяа
• -81 кг. Оюунчимэгийн Шинэбаяр
• -81 кг. Цэрэнбатын Ган-Эрдэнэ
• -70 кг. Дарханбатбаярын Есүй нар барилдана.

Хасагдах шатны барилдаанууд 15:00 цагаас эхэлж, медалийн барилдаан 21:00 цагаас үргэлжилнэ.

Тэмцээнээс алтан медаль хүртсэн Г.Наранцэцэг өөртөө 4000, дасгалжуулагчдаа 1000 нийт 5000 еврогийн (18.9 сая төгрөг) шагнал авлаа.