АНУ-ын ерөнхийлөгч Дональд Трамп ОХУ-ын ерөнхийлөгч Владимир Путинтэй ярилцсанаас нэг хоногийн дараа Украины ерөнхийлөгч Володимир Зеленськийтэй ярьжээ.

Энэ үеэр Трамп Украины цахилгаан станцуудыг өөрсдийн мэдэлд авах санал тавьж, энэ нь Украины эрчим хүчний дэд бүтцийг хамгаалах "хамгийн сайн арга" гэж үзэж байгаагаа илэрхийлжээ.

Тэдний яриа нэг цаг гаруй үргэлжилсэн бөгөөд Трампын тодорхойлсноор маш “үр дүнтэй” байсан гэв.

Зеленський ч мөн Трамптай хийсэн яриагаа “их ач холбогдолтой” байсан гэжээ. Тэрбээр Х хуудастаа “Бид АНУ, ерөнхийлөгч Трамптай хамтран тэдний удирдлага дор энэ жилдээ багтан энх тайвныг тогтоож чадна гэдэгт итгэж байна” хэмээн бичсэн байна.

Трампын хувьд илүү өргөн хүрээтэй гал зогсоох тохиролцоонд хүрэхийг зорьж байгаа ч мягмар гарагт Путин АНУ болон Украины дэмжсэн 30 хоногийн бүрэн хэмжээний гал зогсоох саналыг дэмжээгүй юм.

АНУ-ын Төрийн нарийн бичгийн дарга Марко Рубиогийн мэдээлснээр Трамп Украинд агаарын довтолгооноос хамгаалах нэмэлт системийг Европоос олж авахад туслах тохиролцоонд хүрсэн гэв. 

Мөн талууд дайны нөхцөл байдал хэрхэн өрнөж буй талаарх мэдээллийг нягт солилцохоор болсон гэжээ.

Эх сурвалж: ВВС