Дэлхийн зах зээлд алт, зэсийн үнэ өссөн хэвээр байна. Үүнд АНУ-ын Ерөнхийлөгч Доналд Трампын импортын татвар нэмсэн шийдвэрүүд нөлөөлж байна.

Түүний АНУ-ын худалдааны алдагдлыг бууруулах зорилгоор авч буй шийдвэрүүдийн улмаас хөрөнгө оруулагчид эрсдэлээс сэргийлэн, алт авах нь нэмэгджээ. “Айсан хүн алт авдаг” гэдэг үг санхүүгийн салбарынхан дунд түгээмэл.

Тэд нөхцөл байдал урьдаас таамаглах боломжгүй болж, инфляц өсөх гэх мэт таагүй үед хөрөнгө оруулалтаа алт руу чиглүүлдэг.

“Апекс капитал” компаниас  “Алтны үнэ оны эхэн үеэс 17 хувиар өсжээ. Улс төр, эдийн засгийн тогтворгүй байдал, инфляцын эрсдэл нэмэгдэж буй тул алт нь аюулгүй хөрөнгө оруулалтын хэрэгсэл болж байна” гэж мэдээлэв.

Үнэ өсөж буй энэ таатай үеийг ашиглах нь зөв ч манай улс өнгөрсөн онд нийт 18 тонн алт олборлохоор төлөвлөөд 16.5 тонныг олборлосон.

Алтнаас улсын төсөвт 2023 онд 311 тэрбум, 2024 онд 375 тэрбум төгрөгийг тус тус төвлөрүүлжээ. Харин зэсээс 2023 онд 2.2 их наяд, 2024 онд 2.3 их наяд төгрөгийн орлого олсон байна.

Монголбанкны өнөөдрийн алт авах үнэ нэг грамм нь 349,069 төгрөг байна. Сүүлийн нэг жилд алт худалдан авах үнэ алгуур өсжээ.

Зэсийн баяжмалаа бид 2023 онд нэг тонныг нь 1721 ам.доллараар, 2024 онд дунджаар 1957 ам.доллараар худалджээ.