Экспортын орлого жилийн дүнгээр бараг 40 хувиар өсөж, 399 сая ам.долларт хүрчээ.

Монгол Улс 2024 оны нэгдүгээр сараас наймдугаар сарын хугацаанд нийт 4.85 сая тонн төмрийн хүдэр экспортолсон нь өмнөх оноосоо 32.47 хувиар өссөн үзүүлэлт болсныг Гаалийн ерөнхий газрын статистикаас харж болохоор байна. Мөн экспортын орлого жилийн дүнгээр бараг 40 хувиар өсөж, 399 сая ам.долларт хүрчээ. Тайлант хугацаанд Монгол Улс төмрийн хүдрээ зөвхөн БНХАУ-д нийлүүлсэн.

“Sxcoal”-ийн тооцоолсноор өнгөрсөн VIII сард Монгол Улс нийт 597,500 тонн төмрийн хүдэр экспортолсон. Энэ нь өмнөх оны мөн үеэсээ 15.14 хувиар өссөн ч өмнөх сараасаа 8.65 хувиар буурсан үзүүлэлт болжээ. Зах зээлийн ерөнхий байдлыг харвал БНХАУ-ын сул эрэлтийн нөлөө даамжирч, төмрийн хүдрийн үнэ 2022 оноос хойш анх удаа тонн нь 90 ам.доллароос доош орж буураад байгаа. Ялангуяа энэ он гарсаар төмрийн хүдрийн фьючерс үнэ 30 гаруй хувиар унасан.

Монголын хөрөнгийн бирж өнгөрсөн оны есдүгээр сараас уул уурхайн биржээр төмрийн хүдрийн баяжмал арилжаалж эхэлсэн. 2024 оны эхний хагаст төмрийн хүдэр, баяжмалын 149 арилжаа явагдаж, 983 мянган тонн буюу 71.6 сая ам.долларын дүн бүхий арилжаа хийгдсэнийг тус компани хагас жилийн тайландаа мэдээлж байсан юм.

VIII сард Монгол Улсын экспортолсон төмрийн хүдрийн дундаж үнэ тонн тутамдаа 85.12 ам.доллар байсан нь өмнөх оны мөн үеэс 26 орчим ам.доллароор өссөн дүн болохыг “Sxcoal” онцолжээ.

Б.Бат-Очир