Улаанбаатар хотын түгжрэлийг бууруулах гол төслүүдийн нэг болох Туулын хурдны замын бэлтгэл ажил эрчимжиж, газар чөлөөлөх ажил үргэлжилж байна.

Нийслэлийн авто замын түгжрэлийг 40 орчим хувиар бууруулах зорилготой Туулын хурдны зам болон Шинэ тойрог зам төслүүдийг 2025–2028 онд хэрэгжүүлэхээр төлөвлөсөн. Хурдны замын барилгын ажлыг 2028 оны наймдугаар сард дуусган ашиглалтад оруулахаар төлөвлөсөн аж.

Тус хурдны зам нь Улаанбаатар–Налайхын чиглэлийн авто замаас Баруун аймгийн зам руу салдаг аюулгүйн тойрог хүртэл, Богд уулын урдуур нийт 32 км урт, зургаан эгнээ бүхий олон улсын стандартын гэрлэн дохиогүй экспресс зам байх бөгөөд зорчигчид зогсолтгүй зорчих нөхцөл бүрдэнэ.

Одоогийн байдлаар газар чөлөөлөлтийн хүрээнд:

• Баянзүрх дүүрэгт – 6 нэгж талбар
• Баянгол дүүрэгт – 3 нэгж талбар
• Хан-Уул дүүрэгт – 15 нэгж талбар
• Сонгинохайрхан дүүрэгт – 91 нэгж талбар

нийт 115 нэгж талбар өртөж байгаа бөгөөд эхний ээлжид 15 нэгж талбарт дүйцүүлэн газар олгож, чөлөөлсөн байна. Үлдсэн талбаруудтай зөвшилцөх ажил үргэлжилж байгаа аж.

Мөн Туулын хурдны замтай уялдах Шинэ тойрог замын Нэгдүгээр тойрог замын гүйцэтгэгчийг шалгаруулах тендерийг ирэх сард зарлахаар бэлтгэж байгаа талаар холбогдох албанаас мэдээлжээ.

Эдгээр төслүүд нь Улаанбаатар хотыг хөгжүүлэх 24 мега төслийн хүрээнд багтаж байгаа бөгөөд зам ашиглалтад орсноор түгжрэлийг 40 орчим хувиар бууруулах тооцооллыг мэргэжилтнүүд гаргаад байна.