Монголын нийт багш нарын төлөөлөл цалингаа нэмүүлэхийг шаардаж есдүгээр сарын 24-нд төв талбайд жагссан билээ. Тэд албан ёсны шаардлагаа хүргүүлж төрийн ордныг тойрон алхсан юм.

Харин эдгээр өдрүүдэд тэд талбайд суулт зарлан, тайван замаар шаардлагаа үргэлжлүүлэн хүргүүлж байна. Тэдний гол шаардлага бол багш, сурган хүмүүжүүлэгчдийн цалинг дунджаар ₮3,5 саяд хүргэх юм.

•     Багшлах боловсон хүчинд 5000 гаруй багшийн хомсдол бий болсон. 
•     Цэцэрлэг сургуулийн хүрэлцээ хангалтгүйн улмаас нэг ангид 35-аас дээш хүүхэд сурч байна
•     Хүн амын өсөлтийг дагасан боловсролын байгууллагын шинэчлэл, өргөтгөл хангалтгүй хэвээр
•     Багш нарын ажлын ачаалал ихсэж, боловсролын чанар муудсан
•     Багш, ажилтнуудын хөдөлмөрийн үнэлэмж доогуур амьжиргааны түвшинг хангаж чадахгүй хэмжээнд хүрсэн
•    Салбарын гол ачааг тэтгэврийн насанд ойртсон болон тэтгэвэрт гарсан багш нар үүрч, хүүхдийн төлөө хоёргүй сэтгэлээр ажиллаж байна хэмээж байв. 

Тэд Засгийн газар, Боловсролын яаманд дээр дурдсан асуудлыг шийдвэрлүүлэхээр удаа дараа шаардлага хүргүүлсэн ч үр дүн гарахгүй байна. Иймд жагсаалыг зохион байгуулж, мөн үр дүн гарахгүй бол ажил хаялт зарлахаа тэд мэдэгдээд байгаа билээ. 

Эдгээр өдрүүдэд УИХ-ын чуулганаар төсөв хэлэлцэх ёстой ч, ордонд улс төрийн талцал, "зодоон" үргэлжилж багш, эмч нар, ахмадуудын дуу хоолойг сонсох гишүүн, сайд, улс төрч байхгүй, уг асуудал эзэнгүйдэж байгаа нь харагдаж байна. 

Гэрэл зургийг Б.Даваа