Төрийн байгуулалтын байнгын хороо өнөөдөр Ерөнхий сайд Г.Занданшатарыг огцруулах эсэх асуудлыг хэлэлцэн, хуралдаанд оролцсон гишүүдийн олонх дэмжсэнгүй.  Байнгын хорооны хуралдааны дараа Засгийн газрын гишүүн С.Бямбацогт, Б.Жавхлан, Н.Учрал нар мэдээлэл хийлээ.

С.Бямбацогт, УИХ-ын ТББХ-ны хуралдаанд Засгийн газрыг огцруулахаар гарын үсэг зурсан гишүүдийн олонх энэ хуралдаанд оролцсон. Ерөнхий сайдыг огцруулах санал хураалт явуулахад гурван гишүүн дэмжин, 19 гишүүн татгалзсан санал өглөө. Өөрөөр хэлбэл, “огцруулъя” гэж гарын үсэг зурсан гишүүд маань “огцруулахгүй” гэж санал өгсөн нь гайхаш төрүүллээ.

УИХ-ын чуулганы нэгдсэн хуралдаанаар “Ерөнхий сайдыг огцруулах асуудлыг ямар томъёоллоор санал хураах гэж байна вэ?” гэж хуралдаан даргалж буй Х.Булгантуяа гишүүнээс тодруулж асуухад “Байнгын хорооноос гаргасан томъёоллоор санал хураана” гэж хэлсэн. Ингэвэл Үндсэн хууль зөрчинө шүү! шүү гэж сануулахад “Мэдэж байгаа” гэж хэлсэн.

УИХ Үндсэн хууль зөрчиж, Ерөнхий сайдыг огцруулах асуудлыг хэлэлцэх гэж байна. Тиймээс үүнийг олон нийтэд мэдээлэх гэж зүйтэй гэж байна.

Монгол Улсын Үндсэн хуулийн 43.1-д, УИХ-ын гишүүдийн ¼-ээс доошгүй нь Ерөнхий сайдыг огцруулах саналыг албан ёсоор тавибал УИХ 3 хоногийн дараа хэлэлцэж эхлэн, 10 хоногийн дотор шийдвэрлэнэ. УИХ-ын нийт гишүүний олонх уг саналыг дэмжсэн бол Ерөнхий сайдыг огцруулах тухай УИХ-ын тогтоолыг баталсанд тооцож, шинэ Ерөнхий сайдыг 30 хоногийн дотор томилно” гэж заасан байдаг.

Ерөнхий сайдыг огцруулахыг олонх дэмжээгүй бол уг асуудлаар шийдвэр гарахгүй гэж заасан. УИХ-ын Дэгийн тухай хуульд, Ерөнхий сайдыг огцруулах асуудлыг УИХ-д танилцуулж, сонсоно гэж заасан.

Бусад ердийн хуулийг байнгын хорооны саналаар танилцуулж, санал хураалт явуулдаг. Ерөнхий сайдыг огцруулах асуудлыг өөр тусгай дэгээр явдаг.

Н.Учрал, Сая ТББХ-ны гишүүд манай Засгийн газар хайр зарлаж, Ерөнхий сайдыг огцрохыг дэмжсэнгүй. Ингээд УИХ-д "дэмжээгүй саналыг дэмжье" гэсэн хууль зөрчсөн санал хураалт явуулж, 64 гишүүний дэмжлэг авахгүй бол Засгийн газар огцорсон гэдэг шийдвэр гаргахаар ажиллаж байна. Энэ бол Засгийн газрыг хууль бусаар огцруулах ов мэх гэж үзэж байна. Үндсэн хуулийн бус замаар Засгийн газрыг огцруулах гэж байгаатай бид эвлэрэхгүй. Тиймээс  УИХ-ын дэд дарга Х.Булгантуяад бид шаардлага хүргүүлнэ. 

Б.Жавхлан, УИХ-аар "Ерөнхий сайдыг огцруулахыг дэмжье" гэсэн томъёоллоор санал хураахаас нааш ЗГ-ын гишүүнд чуулганы ирцэд орохгүй. "Дэмжээгүй саналыг дэмжье" томъёоллоор санал хураахад гишүүд гарсан үед унасан саналуудыг босгож болдог. Ерөнхий сайдыг огцруулах асуудлыг ердийн хуулийн адил биш, тусгай дэгээр явуулдаг гэв.