БНСУ-ын Тэжон хотын Бүтээлч эдийн засаг, инновацын төв (CCEI)-ийн төлөөлөгчид Хүннүгийн үеийн язгууртны булшнаас олдсон зарим түүхэн олдворыг хэвлэсэн 3D макетыг ШУА-ийн төлөөлөлд гардуулан өглөө.

ШУА-ийн Археологийн хүрээлэнгийн судлаачид тус төвийн зохион байгуулсан “Pitch to Partnership-3” үйл ажиллагаанд оролцож, хоёр орны археологичдын хамтарсан судалгааны төслийн үр дүн, зарим түүхэн олдворын зургийг илгээсэн нь ийнхүү бүтээл болжээ. Төмрөөс ч бат бөх дэвшилтэт материалаар хэвлэсэн тус бүтээлийг ШУА-ийн Археологийн хүрээлэн хүлээн авчээ.

Тэжон хотын Бүтээлч эдийн засаг, инновацын төв (CCEI)-ийн захирал Парк Дае Хэ, үйл ажиллагаа хариуцсан захирал Хван болон дагалдах зочдыг ШУА-ийн Ерөнхийлөгч С.Дэмбэрэл тэргүүтэй хүмүүс хүлээн авч, хамтын ажиллагааны боломж, чиглэлийн талаар санал солилцов.

Мөн хоёр тал цаашдын хамтын ажиллагаагаа батжуулах хүсэл сонирхлоо илэрхийлсэн санамж бичигт гарын үсэг зурж, бодит ажил хэрэг болох үр дүнтэй хамтын ажиллагаа эхлүүлэхэд сэтгэл зүтгэл гарган ажиллахаа илэрхийллээ.

Эх сурвалж: Монгол Улсын Шинжлэх ухааны академи