БНСУ-ын Олон улсын хамтын ажиллагааны байгууллага (КОЙКА)-ын техник туслалцааны хүрээнд хэрэгжиж буй “Улаанбаатар хотын тогтвортой хөгжлийг хангах, Монгол Улсын бүсийн тэнцвэртэй хөгжлийг дэмжих нь” төслийн зөвлөлдөх уулзалт өнөөдөр боллоо.

Төслийг 2024 оны есдүгээр сарын 20-нд эхлүүлсэн бөгөөд 2027 он хүртэл хэрэгжүүлэхээр төлөвлөжээ. Уулзалтаар:

• Улаанбаатарыг олон төвт хот болгон хөгжүүлэх,
• Дагуул хот байгуулж төрийн байгууллагуудыг нүүлгэн шилжүүлэх,
• Хүннү хотын газар хөгжүүлэлт ба хөрөнгө оруулалтын эрх зүйн орчин,
• Эдийн засгийн чөлөөт бүс, тээвэр ложистикийн бүсийн хөгжил,
• Солонгос дахь хот байгуулалтын туршлага зэрэг сэдвээр илтгэл хэлэлцүүлэв.

Хүннү хотын Захирагчийн чиг үүргийг хэрэгжүүлэгч бүрэн эрхт төлөөлөгч М.Батбаяр “БНСУ Сөүл хотын төвлөрлийг бууруулахдаа төрийн байгууллагыг үе шаттайгаар шилжүүлж, шинэ хот Сэжоныг байгуулсан. Энэ туршлагаа Монголтой хуваалцаж, төслийг хэрэгжүүлж байна. Хүннү хот бол 2040 он хүртэлх хөгжлийн төлөвлөгөөнд багтсан эдийн засгийн бүс, дагуул хотуудын нэг. Төрийн байгууллагыг нүүлгэхтэй холбоотой тээвэр ложистикийн төв, аялал жуулчлал, чөлөөт бүсийн хөгжлийн асуудлыг өнөөдөр хэлэлцэж байна” гэв.

Хан-А хотын судалгааны хүрээлэнгийн захирал Тэ Кёнжин “Шинэ хотууд байгуулах нь Монголын ирээдүйд чухал. Улаанбаатарын төвлөрөл олон асуудал дагуулдаг. Солонгост ч ийм сорилт тулгарч байсан бөгөөд бид газар сонгон суурьшлын бүсийг тархаан байршуулж, дэд бүтцээр холбож шийдсэн. Монголд ч бүсүүд өөр өөрийн онцлогтойгоор хөгжих боломжтой. 

Эхний ээлжид тохиромжтой газрыг сонгоод тархаан байршуулах буюу төвлөрлийг бууруулах төслүүдийг хэрэгжүүлэх хэрэгтэй. Дараа нь тэдгээр бүс нутгуудыг холбосон дэд бүтцийг барьж байгуулах ёстой. Өөрийн гэсэн онцлог бүхий суурьшлын бүсийг бий болгоно гэдэг нь тэнд хүнд хэрэгтэй бүхий л зүйл байх хэрэгтэй гэсэн үг. Түүнчлэн эдгээр бүсүүд өөр өөрийн гэсэн онцлогтой хөгжих хэрэгтэй” гэв