Бага хурлын талаар УИХ дахь МАН-ын бүлгийн дарга Ж.Бат-Эрдэнэ “Бага хурлын гишүүнээс төрийн алба бусад шалтгаантай 49 гишүүнийг чөлөөлсөн.

Дүрмийн дагуу МАН-ын шат шатны дарга нарыг бага хурлын гишүүнээр сонгодог жишгээр нөхөн сонгосон. Хоёрт, МАН-ын даргыг сонгох асуудлыг хэлэлцэж шийдвэрлэлээ. Намын даргад Ерөнхий сайд Г.Занданшатар, УИХ-ын дарга Д.Амарбаясгалан нарын бага хурлын гишүүд өрсөлдсөн.

Санал тоолоход УИХ-ын дарга Д.Амарбаясгалан 56 хувь, Ерөнхий сайд Г.Занданшатар 44 хувийн санал тус тус авсан. Санал хураалт явуулахаас өмнө нэр дэвшигчдийн хэн нь ч гуравны хоёрын санал авч чадаагүй нөхцөлд дахин санал хураалт явуулах журмыг Бага хурлын гишүүд баталсан.

Дахин санал хураалтаар Бага хурлын гишүүн, УИХ-ын гишүүн, УИХ-ын дарга Д.Амарбаясгалан нийт 321 гишүүнээс 275 гишүүн буюу 85.7 хувийн санал авч, МАН-ын даргаар сонголоо. Бид Улс төрийн намын тухай хуулийг үндэслээд МАН-ын дүрмийг баталсан. Хурлын дэг бусад хэлэлцэх асуудал дүрмийн дагуу болсон. Хуралдааны бүх үйл явц дүрэм журмын дагуу, хэлэлцэх асуудал тус бүрийг бага хурлын гишүүдээрээ шийдвэрлэсэн учраас Дээд шүүхэд маргаан гарахгүй гэж үзэж байна. 

МАН-ын XXXI Их хурлыг 2025.11.15-11.16-ны өдөр хуралдах товыг зарласан. Их хуралд нийт 2255 гишүүн оролцохоор байна” гэв.

Харин УИХ-ын гишүүн Ж.Энхбаяр өчигдөр Бага хурлыг орхин гарахаасаа өмнө дараах ингэж ярьсан юм.

-Бага хурал намын Их хурлын чөлөөт цагт орлодог. Намын дүрэмд "Намын даргын орон гарвал Бага хуралд оролцсон нийт гишүүдийн 2/3-ын саналаар намын даргыг сонгоно гэж заасан. Ингэж намын даргыг босгыг өндөрсгөсөн юм. Гэтэл аль ч нэр дэвшигч энэ босгыг даваагүй. Намын их хурлаар 50+1 хувийн саналаар намын даргыг сонгоно.

Дүрэмд маргаан гарсан тул маргааш дахин хуралдах байх. Бага хурал намын даргын асуудлыг эрх зүйн хувьд шийдэх боломжгүй. Учир нь өмнөх дарга Л.Оюун-Эрдэнэ өргөдлөө өгөөгүй. УЗ хуралдан, хуульчидтайгаа ажиллах байх. Дээд шүүхэд бүртгүүлэхийн тулд ямар нэг хуулийн зөрчилгүй байх ёстой. Амьдрал баян тул нарийн зохицуулалтгүй нь харагдлаа. 

Удирдлагын өрсөлдөөн болох нь байдаг л зүйл. Нам эв нэгдэлтэй, нэг үнэт зүйлтэй хэвээр байгаа. Нам хуваагдаагүй. Олон даргын, олон санал хураалтын ард бид гарсан. Нэг талдаа шийдсээр ирсэн. Эрх зүйн маргаан гарахгүй байх нь л чухал. Би энэ намд 30 жил боллоо" гэв.   

-Таныг дарга нарын хооронд хов зөөсөн гэсэн. 
-Тийм дэмий юм яриад яах вэ гэж сэтгүүлчийн асуултад хариулав.  

Дүн гарсны дараа өмнөх намын дарга Л.Оюун-Эрдэнэ тамгаа Д.Амарбаясгаланд гардуулан өгчээ.