УИХ-ын гишүүн Г.Амартүвшин Хөгжлийн банкны шүүх хуралд оролцож, мэдүүлэг өгч байна. Тэрээр "Би Хөгжлийн банкны захирал болохоос өмнө Хас банкны захирал байсан тул ажил үүргийн хуваарийн дагуу олон компанийн захирлыг мэднэ, танина. Хөгжлийн банкнаас "Вертекс майнинг партекс" компани 2019 онд зээл авахад би Х.Ганхуяг гишүүнтэй найз байгаагүй. Мөн тэр үед би ТУЗ-ийн гишүүдийг ч сайн таньдаггүй байв, тэдэнд нөлөөлж, шийдвэр гаргуулаагүй. Дэлхийн манлайлагчдын байгууллага гэж бий. Тэнд Х.Ганхуяг гишүүн бид хоёр Монгол Улсыг төлөөлдөг. Өөр холбоо сүлбээ байхгүй"  

Энэ компани 33 тэрбум төгрөгийн зээл аваад хүүнд нь 10 тэрбум төгрөг төлжээ. Эндээс энэ зээл банканд ашигтай байсныг харж болно. Энэ зээл Хөгжлийн банкны үзэл баримтлалд тохирсон. Зээл гаргах шийдвэр буруу байгаагүй. Шүүх энэ хэрэгт намайг буруугүй гэдгийг тогтооно гэдэгт итгэлтэй байна. Энэ зээлийг олгосноос 2 сарын дараа ковидын халдвар тархсан. Энэ эрсдэлийг хэн ч таах аргагүй байсан. Гэсэн хэдий ч энэ компани зээлээ төлсөн" гэв.        

"Вертекс майнинг партекс" компанийн зээлийн баримтад гарын үсэг зурсан мэргэжилтнүүдийг ч мөн хэрэгт татжээ.  Энэ зээлийн хууль зүйн дүгнэлт гаргасан хуульч н.Мөнхбаяр "Г.Амартүвшин захирал надад нөлөөлөөгүй. Барьцаа хөрөнгө хангалтгүй гэсэн дүгнэлтийг би биш санхүүгийн мэргэжилтэн гаргасан. Иймд би зээлийг олгох нь эрсдэлтэй гэж дүгнэсэн. Удалгүй барьцаа  хөрөнгийн шаардлага хангасан гэж дахин өөр дүгнэлт ирүүлсэн. Ажилтнаасаа ажлыг шаардах нь бүх л удирдах ажилтны эрх үүрэг. Үүнийг шахалт дарамт гэж үзэж болохгүй. Би алдаа гаргаагүй, ажлаа зохих журмын дагуу хийсэн. Эхлээд намайг гэрчээр дуудаад дараа нь хэрэгт татаж оруулсанд харамсалтай байна" гэв.

Тус компанийн зээлийг хоёр удаа хэлэлцжээ. "Вертекс майнинг партекс" компани 12 ширхэг уул уурхайн хүнд машин механизм, газраа барьцаалсан байна.