Зочид буудлын салбарын орлого 2023 онд 534.4 тэрбум төгрөг хүрч, өмнөх оныхоос  41.1 хувиар өссөнийг Үндэсний статистикийн хороо мэдээлэв.

Гурав ба түүнээс дээш одтой зочид буудлын орлого 43.8 хувиар, зэрэглэлгүй зочид буудал болон амралтын газрын орлого 33.9 хувиар өссөн нь голлон нөлөөлсөн байна. Нийт орлогын дийлэнхийг буюу 72.6 хувийг гурав ба түүнээс дээш одтой зочид буудал бүрдүүлжээ.

Мөн 650 мянга гаруй жуулчин хүлээн авсан 2023 онд зочид буудлын салбар 60 хувийн өсөлттэй байсныг БОАЖЯ мэдээлж байсан юм.

Харин олон улсад 2023 онд эрчимтэй сэргэж байсан зочид буудлын ор хоногийн орлого 2024 онд саарна гэж “Fitch Ratings” тооцоолсон байна.

Учир нь инфляцын дарамт өндөр хэвээр, хөдөлмөрийн зах зээл суларч байгаатай холбоотойгоор аялагчид илүү хямд зардлаар аялах сонирхол ихэснэ. Энэ утгаараа зочид буудлын операторуудын үнийг бууруулж, ашигт ажиллагаанд тодорхой хэмжээгээр нөлөө үзүүлнэ гэж үзжээ.

О.Нарантуяа