ОХУ-ын Засгийн газраас дотоодын зах зээлээ тогтворжуулахын тулд  хуучин ЗХУ-ын бүрэлдэхүүнд байсан дөрвөн орноос бусад улс руу бензин, дизель түлш экспортлохыг түр хугацаагаар хориглоно гэж мэдэгдлээ. Тэдгээр дөрвөн улс нь Казахстан, Киргиз, Беларусь, Армен юм. 

Энэ мэдэгдлийн дараа өнөөдөр УУХҮ-ийн сайд Ж.Ганбаатар мэдээлэл хийв. Тэрбээр "Манай улс дизель түлш болон бензиний 30-аас дээш хоногийн нөөцтэй байгаа. Дизель түлшний нөөц бензинээс илүү байгаа тул намрын ургац хураалтад шатахууны хомсдол үүсэхгүй. Мөн шатахууны үнийг нэмэгдүүлэхгүй гэсэн бодлого барина" гэв. 

Гэвч өнөөдөр нийслэлийн ШТС-ууд ачаалал ихтэй ажиллажээ. Манай улс шатахууны хэрэглээнийхээ 85-90 хувийг ОХУ-ын "Роснефть" компаниас худалдан авдаг тул хомсдол үүсэж болзошгүй хэмээн болгоомжилж иргэд шатахуунаа нөөцөлж авахыг хичээж буй бололтой. 

Өнөөдөр 17.00 цагийн орчимд Энхтайваны гүүрний баруун дор байрлах ШТС-д автомашинууд дугаарласан байв. Шатахуун үнэд ямар нэг өөрчлөлт ороогүй байв.

Дугаарлан зогсож, 4-5 машины дараа очиход шатахуун түгээгч "Өнөөдөр ачаалал маш их байна. Өдрийн хоол ч идэх чөлөө өгөхгүй жолооч нар дугаарлалт үүсгэж байна. Шатахууны нөөц хангалттай байгаа, шатахуун дуусахгүй" гэж бидэнд мэдээлэл өгсөн гэлээ.