Дэлхий нийтийн анхаарлыг татаад буй харамсалтай үйл явдал болох Турк, Сирийн газар хөдлөлтийн уршгаар олон мянган хүн амь нас эрстэж, нурангид дарагдсан хүмүүсийг аврах ажиллагаа үргэлжилсээр байгаа билээ. Онцгой байдлын болон цэргийн хүчний олон аврагч дэлхийн өнцөг булан бүрээс ирж тусламжийн гараа сунгаж буй. Мөн эрлийг хамгийн чадварлаг гүйцэтгэдэг үнэрч, аврагч нохдыг энд дурдах нь зүйтэй билээ. Эрдэнэт хүний амийг аврах, тэднийг нуранги доороос олох ажиллагааг үр дүнтэй явуулахад дөрвөн хөлт аврагчдын үүрэг их.

Аврагч ноход сураггүй алга болсон хүнийг үнэр, дуу чимээ, амьсгалаар нь хайна. Мөн зорилтот хүнийг хайлгахдаа хувцсыг нь үнэртүүлж, нохой хайсаар үнэрийг олж илрүүлээд хуцах эсвэл урд савраараа маажиж ухах байдлаар хөтөчдөө мэдэгддэг.

Фрида бол Мексик, Гайти, Гватемал, Эквадор улсад хийсэн аврах ажиллагааны үеэр 12 хүний амийг аварч, 40 хүний цогцсыг олсон баатарлаг нохой юм. Фрида өнгөрсөн жил хөгширч нас барсан ч 2017 онд Мексикт болсон газар хөдлөлтийн үеэр хамт ажилласан багийнхан нь өнөөдөр Турк Улсад аврах ажиллагаа явуулж байгаа гэнэ.

Бельгийн Малиноис үүлдийн Экко дуудлагатай аврагч нохой тэнгисийн цэргийн флотын багийн нэг гишүүн бөгөөд Мексикийн нисэх онгоцны буудал дээр Турк руу хөдлөх гэж буй агшин.

Турк руу эрэлч нохдын хамт явсан орон орны аврагчид:

• Монгол Улсаас 35 хүн, хоёр нохой
• Грек Улсаас 21 хүн, хоёр  нохой
• Ливи Улсаас 55 хүн, дөрвөн нохой
• Герман Улсаас 50 хүн, долоон нохой
• АНУ 100 хүн,  зургаан нохой
• Их Британи Улсаас 76 хүн ба ноход /тоо нь тодорхойгүй/
• Энэтхэг Улсаас 100 хүн, тусгайлан бэлтгэгдсэн нохойн анги
• Тайвань Улсаас 130 хүн, эрлийн таван нохой
• Швейцарийн REDOG аврагч нохойн албаны 22 аврагч, 80 мэргэжилтэн, 14 нохой
• Чех Улсаас үнэрч нохойтой мэргэжилтнүүд зэрэг 68 хүний бүрэлдэхүүн
• Польш Улсаас 76 хүн, найман  нохой
• Хорват Улсаас 40 хүн 10 нохойн хамт тус тус Турк, Сири Улс руу явжээ.

Эх сурвалж: BBC, Associated Press