Гадаад хэргийн сайдаар Лүндэгийн Пүрэвсүрэн ажиллахаар болсон. Тэрээр гадаад харилцааны салбарт шинэ хүн биш. 2009 оноос хойш Ерөнхийлөгч Ц.Элбэгдоржийн Аюулгүй байдал, гадаад харилцааны бодлогын зөвлөхөөр ажиллаж эхлэхээс өмнө Л.Пүрэвсүрэн Гадаад харилцааны яаманд ажиллаж байсан юм. Тэгэхээр түүнд ажилтайгаа, хүмүүстэйгээ танилцана гэж цаг алдах шаардлага байхгүй. Мөн мэргэжлийн байх ёстой гэдэг шаардлагад зохицох цөөн сайдын нэг.

Энэ жил манай улсад хоёр хөршийн төрийн тэргүүнүүд ар араасаа айлчиллаа. Өнгөрсөн жил АОХН-ийн дээд хэмжээний уулзалтын үеэр Мъянмарын сөрөг хүчний тэргүүн Ан Сан Су Чи зэрэг дэлхийд нэр хүндтэй,томоохон удирдагчид манай улсад айлчилсан. Энэ бүхэнд Ерөнхийлөгчийн санаачилга, нэр хүндээс гадна түүний багийн хүчин чармайлт нөлөөлсөн нь тодорхой юм.   

Л.Пүрэвсүрэн сайдад УИХ-ын гишүүд хөрөнгө оруулалтаа өсгөхийг захьсан. Энэ нь түүний өмнө тулгарч буй хамгийн том бэрхшээл гэхэд болно. Өнөөдрийг хүртэл Хөрөнгө Оруулалтын газар л гаднаас Монгол руу чиглэх мөнгөн урсгалыг хариуцаж байв. Харин одоо Л.Пүрэвсүрэн сайдыг ч дайчиллаа.

Ерөнхий сайд асан Н.Алтанхуяг ажлаа аваад удаагүй байхдаа Монгол Улсыг төлөөлөн хилийн чанадад ажилладаг Элчин сайд нартай уулзсан. Ингэхдээ тухайн орноос хэдий хэмжээний хөрөнгө оруулалт татсанаар та нарын ажлыг дүгнэнэ гэж байсан юм. Энэ санал бодит ажил хэрэг болсон эсэх нь тодорхойгүй.

Иймд Л.Пүрэвсүрэн сайд энэ саналыг эргэж харах биз. Эс бөгөөс сайд энд ганцаараа мянга зүтгээд өнөөгийн нөхцөлд хөрөнгө оруулалт татах нь ихээхэн бэрхшээлтэй. Нөгөөтэйгүүр “Гадаад харилцааг эдийн засагжууулах хөтөлбөр”-ийг баталсан ч үр дүн нь өнөөг хүртэл ил тод биш байсаар ирлээ. Шинэ сайд энэ хөтөлбөрт ч салхи оруулах биз.  

Хувь хүнийх нь хувьд товч танилцуулвал шинэ сайд хөл бөмбөгт ихээхэн хорхойтой. 1989 онд Москва хотын олон улсын дээд сургууль төгссөнөөсөө хойш ХБНГУ, Шинэ Зеланд, АНУ-д мэргэжил дээшлүүлснийг нь харвал тэрээр мэдлэг чадвараа дээшлүүлэхэд ихээхэн анхаардаг бололтой.