Амьдралд юу ч тохиолдсон шантралгүй урагш тэмүүлнэ гэдэг амьдралын нэг чухал хөдөлгүүр. Аливаа осол бэртэл хүний амьдралд арилшгүй хар толбо үлдээж болох ч зарим нэгэнд нь хоёр алхам урагшлах зориг нэмж буйн нэг жишээ бол Ю.Бекболат юм. 

Гэнэтийн ослын улмаас гараа бэртээж, олон ажлаас татгалзсан хариу сонссон ч чадна гэдэгтээ итгэж, өөрийгөө таниулж чадсан Ю.Бекболаттай уулзуулж байна.

Тэр бол дөрвөн хүүхдийн аав. Зөв хүн байхыг энгийн жижиг зүйлсээр тэдэндээ уриалахыг зорьдог. Тэрбээр бизнесийн удирдлагаар төгсөж, одоогоор “Оюу толгой” компанийн гүний уурхайд захиргааны ажилтнаар ажиллаж байгаа юм.

Өнөөдрийн ажлын байранд ирэх хүртэлх түүний зам тийм ч дардан байсангүй. Тэрбээр олон жилийн өмнө санамсаргүй гарсан ослын улмаас гараа бэртээсэн аж. Үүнээс хойш хөгжлийн бэрхшээлтэй гэх шалтгаанаар 30 гаруй ажлын байрнаас татгалзсан хариу сонссон тухайгаа тэр ярьсан юм. 
Түүний юу чадахыг сорьж ч үзээгүй хэр нь “Энэ хүн чадахгүй, энэ хүнд тохирох ажлын байр байхгүй” гэсэн өрөөсгөл ойлголттой байгууллага олон гэв.

Гэхдээ тэрбээр бууж өгөөгүй. Илүү хөгжиж, бусдаас ялгарч чадвал хэзээ нэг өдөр хүссэн ажилдаа орно гэсэн итгэл өвөртөлсөөр өнөөдрийг хүрсэн. Ажиллах хүсэл нь ундарч байгаа түүнийг ердөө үг төдийхөн шалтгаанаар буцаасан ч шантралгүй зүтгэсээр байсан нь бахархмаар.

Зогсолтгүй суралцсаар байгаа Ю.Бекболатын хамгийн том ар тал нь түүний гэр бүл гэв.

“Оюу толгой” компани хөгжлийн бэрхшээлтэй иргэдийг дэмжин ажилладаг. Тэдний нэг төлөөлөл нь Ю.Бекболат юм. Тэрбээр одоогийн ажилдаа ороод гурван жил болж байна.

Энэ хугацаанд байгууллагаасаа их ч зүйл суралцаж, өөрөө ч тус компанид хувь нэмэр оруулсан тухайгаа онцлов.

Тэрбээр өдөр тутамдаа ажилчдын нислэгийн хуваарь, хамгаалах хэрэгслүүдийг системд шивж оруулах, зочдын нэрсийн жагсаалт гаргах, чөлөөний хуудас бичих, гүний уурхайд нэвтэрч буй хүмүүст дэмжлэг үзүүлэх зэрэг ажил гүйцэтгэдэг.
Энэ мэтчилэн түүнд компьютертой ажиллах шаардлага их гардаг аж. Тэр тусмаа гараа гэмтээсэн түүний хувьд бичих, шивэх гэх мэт чимхлүүр ажил тийм ч амаргүй. Гэхдээ тэр уг ажлыг гартаа оруулахын тулд нэлээдгүй хичээсэн юм.

Ажлын хүрээнд жил бүр 1-3 удаа ур чадвар сайжруулах сургалтуудад хамрагддаг бөгөөд зогсолтгүй суралцсаар байгаа Ю.Бекболатын хамгийн том ар тал нь түүний гэр бүл гэв. “Чи чадна, чи үүнийг хийх ёстой” хэмээн зоригжуулах тэднийхээ урмын үгэнд ухралгүй урагшилсаар иржээ.

Түүний хувьд осолд орсноосоо хойш аюулгүй ажиллагааны дүрмийг чандлан баримталж байгаа. Ажил дээр ч, амьдрал дээр ч аюулгүй байхыг эрхэмлэж буй түүний зарчимд “Оюу толгой” компанийн аюулгүй ажиллагааны дүрэм ихээхэн нөлөөлж байгаа гэнэ.

Ю.Бекболат өөртэй нь адил осол гэмтлийн улмаас бэртсэн хүмүүст тохирсон ажлын байран дээр өөрийгөө сорьж үзэх хэрэгтэйг зөвлөсөн.

“Хэрэв та чадна гэсэн итгэлтэй л байвал, өөрийгөө таниулах хэрэгтэй”

“Хэрэв та чадна гэсэн итгэлтэй л байвал, өөрийгөө таниулах хэрэгтэй” хэмээн тэр хэлсэн юм. Нэг үеэ бодвол байгууллагууд хөгжлийн бэрхшээлтэй иргэдийг ажлын байраар хангах нь нэмэгдэж, боломж нээлттэй байгааг мөн онцлов.

Хэдэн жилийн өмнө, оюутан байхдаа төгсөөд "Нэг тийм гоё ажилд л орчих юмсан" гэсэн мөрөөдөл нь "Оюу толгой" компанид ороод биелсэн гэнэ. Түүний хувьд аливаад үнэнч шударга хандаж, хийж буй ажлаа дурлаж хийхийг зорьдог хэмээн өөрийгөө тодорхойлсон. 

Ярилцлагын хугацаанд түүний хэлсэн үгс, нүдний харц нь үнэхээр л тухтай орчинд, дуртай зүйлээ хийж байгааг нь батлах шиг болсон юм. 

Гэрэл зургийг Б.Даваа