Энэ оны эхний есөн сард төлбөрийн тэнцэл 251 сая ам.долларын алдагдалтай гарав.

Урсгал, барааны болон үйлчилгээний данс ашигтай эсвэл алдагдалтай байгаагаас төлбөрийн тэнцэл хамаардаг. Тэгвэл урсгал данс энэ оны эхний есөн сарын байдлаар 1.3 тэрбум ам.долларын алдагдалтай байв.           

Учир нь боловсрол, эрүүл мэнд, хувийн аялал жуулчлал, тээврийн үйлчилгээг бид гаднаас авдаг тул валют гадагшилсаар байна. Тодруулбал бид хүүхдүүдээ гадаад улсуудад сургаж, эрүүл мэндийн үйлчилгээг өндөр хөгжилтэй орнуудаас авч, нүүрсээ урд хөршийн тээврийн компаниудаар зөөлгөдөг. Мөн Турк, Вьетнам гэх мэт улс руу аялцгаадаг.  

Байгаль орчин, аялал жуулчлалын яамнаас “Нэг хонь нэг жуулчин” аяныг санаачлан, БНСУ-ын алдартнуудыг Монголд урьж аялуулсан. Гэвч монголчуудын гадаадад аялсан нийт зардал манай улсад ирсэн жуулчдын оруулсан орлогоос хоёр дахин их хэвээр байна.

Энэ оны эхний гурван улиралд гаднын жуулчид манай улсад  489 сая ам.долларын орлого оруулсан бол дотоодын жуулчдын гадагшаа аялсан зардал нь 1.2 тэрбум ам.доллар хүрчээ.