“Оюу толгой” компани энэ оны гуравдугаар улирлын тайлангаа танилцуулсан.

Тус компанийн үйлдвэрлэлийн мэдээлэлд “2023 оны III улиралтай харьцуулахад зэсийн үйлдвэрлэл 19 хувиар өссөн. Энэ нь гүний уурхайд үйлдвэрлэл эрчимжиж, хүдрийн агуулга нэмэгдсэнтэй холбоотой. Гэвч баяжуулах үйлдвэрийн төлөвлөгөөт засвар үйлчилгээ, цаг агаарын таагүй байдал нь ил уурхайн үйл ажиллагаанд нөлөөлж, үйлдвэрлэл өмнөх улирлаас 5 хувиар буурсан” гэжээ.

Гүний уурхайн 0-р Панел нийт 120 хүдэр буулгуурыг нээж, III улиралд зургааг ашиглалтад оруулсан байна. Энэ улиралд гүний уурхайгаас 2.05 хувийн дундаж зэсийн агуулгатай 1.5 сая тонн хүдэр, ил уурхайгаас 0.39 хувийн дундаж агуулгатай 7.4 сая тонн хүдэр боловсруулжээ.

"Оюутолгой" компани үйлдвэрлэл хэвийн үргэлжилж, 2028-2036 онд гүний болон ил уурхайгаас жилд 500 мянган тонн зэс (100%-ийн цэвэр металл) олборлох зорилготой ажиллаж байна.