Хавдар судлалын үндэсний төв /ХСҮТ/-ийн хөнгөвчлөх тасгийг өргөтгөж байгаа гэсэн шалтгаанаар өвчтөн хүлээж авахгүй байгаа тухай эх сурвалж мэдээлэв.

Тодруулбал тус иргэн өнгөрсөн баасан гарагт ХСҮТ-ийн хөнгөвчлөх тасагт аавыгаа хэвтүүлэхээр очсон ч өргөтгөл хийж байгаа шалтгаанаар хүлээж авалгүй Яаралтай тусламжийн тасагтаа хэвтүүлжээ. Ингээд өнөө өглөө Баянзүрх дүүргийн эмнэлэг рүү нэн хүнд гэсэн бичиг хийж өгөөд явуулсан аж.

Тухайн өдөр тус тасагт хэвтэн эмчлүүлэхээр очсон хэд хэдэн хүн ижил шалтгаанаар буцаагдаж, зарим нь гэртээ харихаас өөр аргагүйд хүрчээ. 

Хөнгөвчлөх тусламж үйлчилгээ нь эдгэх боломжгүй болсон хорт хавдрын төгсгөлийн шатандаа орсон өвчтөний өвдөлт болон биеийн зовиур шаналгааг хөнгөвчлөх, ар гэрийнхэнд нь тусламж үйлчилгээ үзүүлэхэд чиглэсэн эмчилгээ, сувилгаа, асаргаа, сургалтыг хэлдэг юм. 

Иймд хавдрын хүнд шатанд орсон өвчтөнүүд болон ар гэрийнхэн нь хөнгөвчлөх тусламж үйлчилгээ үзүүлэх бүхэл бүтэн нэг тасаг хаагдсанд бухимдалтай байна.

Бид энэ талаар холбогдох яамд болон эмнэлгээс тодруулан эргэн мэдээлэх болно. Харин ХСҮТ дараах тайлбарыг өгөв.

-Яг одоо хөнгөвчлөх тасаг хэвийн ажиллаж байгаа бөгөөд  одоогоор ямар нэгэн шалтгаанаар тасаг хаагдсан зүйлгүй байна. Харин ирэх долоо хоногоос засвар хийхтэй холбогдуулан хөнгөвчлөх орнуудыг тасгуудад хуваарилан тараах зохион байгуулалтын бэлтгэлийг хийж байна. Үүнтэй холбоотойгоор аймаг дүүргийн эмнэлгүүдэд өөрийн харьяаны хөнгөвчлөхийн өвчтөнүүдэд тусламж үйлчилгээг тасралтгүй хүргэх асуудлаар арга зүйгээр ханган, хамтран ажиллаж байгаа болно гэж нүүр хуудсаараа дамжуулан мэдээлэв.