“Монос Косметик” компани нь үүсгэн байгуулагдсан цагаасаа хойш Монголын гоо сайхны салбарыг шинэ түвшинд хөгжүүлэхэд үнэтэй хувь нэмэр оруулан, орчин үеийн шинэлэг технологийг улсдаа нэвтрүүлэн амжилттай үйл ажиллагаа явуулсаар ирсэн билээ. 1990 онд хамгийн анхны “Булга”, “Марал” нэртэй нүүрний тос үйлдвэрлэн гаргаж байсан цагаас хойш эдүгээ үйлдвэрлэлийн шугамаар 90 гаруй нэр төрлийн, органик үйлдвэрлэлийн 40-өөд нэр төрлийн арьс арчилгаа, үс арчилгаа, бие арчилгаа, хүүхдийн арьс арчилгааны бүтээгдэхүүн гар ариутгагч, санитас гарын шингэн саван зэрэг нийт 130 гаруй нэр төрлийн бүтээгдэхүүнийг үйлдвэрлэн Монголынхоо хэрэглэгчдэд хүргэж байна. Мөн энэ хугацаанд Монгол хүний ур ухаан шингэсэн гоо сайхны бүтээгдэхүүнийг дэлхийд таниулах, гадаад улсад экспортлох томоохон алхамуудыг эхлүүлээд байгаа юм.

Монос Группийн ууган компаниудын нэг  болох Монос Косметик ХХК нь анх байгуулагдсан цагаасаа хойш эх орны эрдэс, амьтан ургамлын гаралтай биологийн идэвхт бодисоор гоо сайхны бүтээгдэхүүн үйлдвэрлэж ирсэн бөгөөд хамгийн анхны томоохон брэнд бол Барагшунтай, Гүүний саамтай, Чацарганатай Биомон арьс арчилгааны иж бүрдэл юм. Биомон нь Монголчуудын гоо сайхны эртний уламжлал, байгаль цаг уурын онцлогт төгс тохирсон бүтээгдэхүүн төдийгүй 2005 онд Монгол улсын төрийн шагнал хүртэж, Дэлхийн оюуны өмчийн байгууллагын алтан медаль хүртэж байсан юм.

Түүний дараагаар 2017 онд зах зээлд Гурамсан хандтай шампунь, Чихэр өвсний хандтай Гангын хандтай гурван төрлийн Биомон Шампунь, Хүүхдэд зориулсан хонины сүүлтэй тосыг амжилттай нэвтрүүлсэн.

2016-2018 онуудад Монос Косметик компани нь БНСУ-ын Даэгү Хааны их сургуулийн дэргэдэх гоо сайхны судалгаа, хөгжлийн лабораторитой шинэ бүтээгдэхүүний технологийн судалгаа шинжилгээний ажлыг хамтран хийж 2019 онд 13 нэр төрлийн шинэ бүтээгдэхүүнийг зах зээлд амжилттай нэвтрүүлсэн. Тухайлбал органик орц найрлагатай дэвшилтэт технологиор хийгдсэн хүүхдийн бие арчилгааны ком бүтээгдэхүүн, том хүний биеийн шингэн саван, лосьон зэрэг олон шинэ бүтээгдэхүүнийг үйлдвэрлэн хэрэглэгчдийн гарт хүргээд байна.

Мөн 2018 онд   Монос Косметик ХХК нь 100% органик орц найрлагатай, байгальд ээлтэй, дахин боловсруулсан савлагаатай гоо сайхны органик “МОЙЛ” брэндийг зах зээлд амжилттай нэвтрүүлж хэрэглэгчдийн талархалыг хүртээд байгаа юм.  МОЙЛ брэнд нь өнөөдөр 8 нэрийн 66 төрлийн Монголын Худалдаа аж үйлдвэрийн Органик арьс арчилгааны бүтээгдэхүүний гэрчилгээгээр баталгаажсан бүтээгдэхүүнийг зах зээлд амжилттай нэвтрүүлээд байна.

Монос Косметик ХХК нь 2018 онд Монголын гоо сайхны үйлдвэрлэлийн салбарт шинэчлэл хийж салбартаа анхдагч олон улсын ISO 9001:2015 чанарын менежментийн тогтолцоог үйл ажиллагаандаа амжилттай нэвтрүүлж дэлхийн ТОП-5 баталгаажуулалтын байгууллага болох AFNOR группээс гэрчилгээгээ гардан авсан. 2020 ондоо багтан  Монос Косметик ХХК нь GMP олон улсын стандарт бүхий гоо сайхны жишиг үйлдвэрийг ашиглалтанд оруулах зорилго тавин ажиллаж байна.