Дорнод аймгаас шатахуунаа татдаг тус аймгийн сумд болон Хэнтийн Дадал, Норовлин суманд АИ-92 бензиний хомсдол үүсжээ.

Энэ талаар нутгийн иргэдээс тодруулахад, Дорнод аймгийн Баян-Уул суманд 9-р сарын 20-доос хойш бензин хязгаартай олгож ШТС-уудад урт дараалал үүсэж байсан бол 26, 27-ны өдөр болсон тус сумын ерөнхий боловсролын сургуулийн 100 жилийн ойн баярын үеэр чөлөөтэй олгожээ. Сургуулийн ойн баяр өнгөрснөөс хойш сумын ШТС-уудад өдөрт 2 тонн бензин худалдаж буй бөгөөд 10-р сарын 7-ны өдрийн байдлаар суудлын машинд 50 мянга, мотоциклд 30 мянган төгрөгөөс дээш үнийн дүнгээр бензин олгохгүй байгаа аж.

Баян-Уул сумтай хил залгаа Хэнтий аймгийн Норовлин, Батноров суманд мөн адил АИ-92 бензин тасалдаж, иргэдэд хязгаартай олгож байна. Харин дизель түлш хэвийн түгээж байна гэж нутгийн иргэд ярив.

Аж үйлдвэр, эрдэс баялгийн сайд Г.Дамдинням өчигдөр /2025.10.06/ мэдээлэл хийхдээ энэ талаар сэтгүүлчдэд мэдээлэл өгсөн. Тэрбээр, Манай улс шатахууны хувьд хойд хөршөөс 100 хувь хамааралтай боловч ОХУ-д нөхцөл байдал туйлын хүнд байгаа. Гэвч Монгол Улсын Ерөнхий сайд Владивостокийн дээд хэмжээний уулзалтын үеэр ОХУ-ын Ерөнхийлөгч В.Путинтай тохиролцсон, хоёр орны хоорондын гэрээ хэлцлийн үр дүнд шатахууны нийлүүлэлт хэвийн байна.

Суманд гурван ШТС байлаа гэхэд нэгд нь заавал байгаа. Ялангуяа баруун аймагт хязгаарлалтад орсон учир төвөөс хангаж байна. Тиймээс бага зэрэг тасалдал үүссэн. Гэхдээ нийлүүлэлт хэвийн үргэлжилнэ.

Монгол Улс өнгөрсөн 35 жилд шатахуун нөөцлөх савыг нэмэгдүүлэх арга хэмжээ нэг ч удаа авч байгаагүй юм билээ. Бид одоо ирэх оны төсөв болон төсөл хөтөлбөрийн хүрээнд 50 орчим тэрбум төгрөгийн хөнгөлөлттэй зээлийн эх үүсвэр гаргаж, шатахуун нөөцлөх савны хэмжээг нэмэгдүүлж, нөөцийг нэг сарын хугацаагаар нэмэгдүүлэх боломжийг ААН-үүдэд олгохооор төлөвлөн ажиллаж байна.

Хоёрдугаарт, Дорноговь аймгийн Алтанширээ суманд баригдаж байгаа нефьтийн үйлдвэрийн ажил эрчимтэй өрнөж байна. 2027 оны төгсгөлд бүрэн ашиглалтад орно. Боловсруулах нөөцтэй холбоотойгоор дотоодод хайгуул явуулж, гадаадаас импортлох зэрэг бүх хувилбараар ажиллаж байна гэлээ.