Өнөөдрийн УИХ-ын ээлжит чуулган эхэлсэн ч ирц бүрдэхгүй, маш олон гишүүн хуралдаа ирээгүй тул дэд дарга Х.Булгантуяа гишүүдийг хуралдаа ирэхийг уриалж, ирээгүй гишүүдийн нэрсийг дуудлаа. 

Сая намайг хэд хэдэн сайд нар дарамталж байна. "Чи Үндсэн хуулийн цэц дээр очно шүү" бүр зарим нь "Шоронд сууна шүү" гэж хүртэл дарамталлаа

Үе үеийн өмнөх ерөнхий сайд нарыг хэрхэн огцруулах эсэхэд санал авч байсан талаарх протоколыг тэрбээр тус бүр уншиж танилцуулаад "Төрийн байгуулалтын байнгын хороогоор санал авч хэлэлцэх эсэхийг шийдэж буйг "Үндсэн хуулийн зөрчил" гэж үзэн мэдээлэл хийжээ. Ж.Батжаргал гишүүн ч яг энэ горимоор санал хураалтад өмнө нь оролцож байсан. Бид УИХ-ын чуулганы дэгээс өөр зарчмаар санал хураалт явуулах нь харин үндсэн хууль зөрчинө гэсэн үг. Сая намайг хэд хэдэн сайд нар дарамталж байна. "Чи Үндсэн хуулийн цэц дээр очно шүү" бүр зарим нь "Шоронд сууна шүү" гэж хүртэл дарамталлаа. Сайд нар шүүхийн шийдвэрийг УИХ-ын танхимд уншдаг, Үндсэн хуульд байхгүй нөхцөл байдал руу орж байгаа юм байлгүй дээ" гэлээ. 

Тэрбээр сайд нарыг хуралдаа орж ирэн шаардлагатай бол саналаа илэрхийлж, цаг тулсан төсвөө баталж, гишүүний хүлээсэн үүргээ биелүүлэх, үүсээд буй нөхцөл байдалд /ажил хаялт гм/ даруй арга хэмжээ авах шаардлагатай байгааг онцлоод гишүүдийг суудалдаа суухыг удаа дараа сануулж, шаардан "аргадлаа". Нийт 126 гишүүнээс 47 нь чуулгандаа иржээ. 

Танхимд байгаа цөөн хэд нь хоорондоо маргалдаж чанга чанга хашхичиж байгаа нь дэд даргын микрофоноор сонсогдоно. 

УИХ-ын дэд дарга Х.Булгантуяагийн хэлсэн үгсээс онцолбол

• Татвар төлөгч, ард иргэдийн өмнөөс чуулгандаа суухыг уриалж байна.
• Та бүхэн ард түмний төлөө морь, нохой мэт зүтгэнэ гэж амласнаа санаарай. 
• Төрийн байгуулалтын байнгын хорооноос гарсан саналыг /ЕС-ийг огцруулахыг дэмжээгүй/ УИХ-ын чуулганд танилцуулах үүрэгтэй ч гишүүд танхимд орж ирэхгүй байна.
• Хүүхдийн тоглоом аятай, чуулгандаа суухгүй, улс даяар нэрээ дуудуулна гэдэг байж боломгүй.
• Нийгэм эдийн засгийн хувьд тулгамдаад буй төсвийн төслөө бид яаралтай хэлэлцэх шаардлагатай байна.
• Наанадаж 10 хоногийн дотор хэлэлцэж дуусгах олон төсөл байна.
• Та бүхэн өөрсдийгөө Ерөнхийлөгч шиг эрхтэй гэж бодоогүй биз дээ.
• УИХ-ын гишүүн нь хүндэтгэх шалтгаангүй бол, дэгийн тухай хуулиар чуулгандаа суух ёстой. 
• Ард иргэд, үзэгчид харж байгаа шүү, хэн нь хэн бэ гэдгийг андахгүй хэрсүү болсон.

Гишүүд өнөөдөр дараах асуудлыг хэлэлцэхээр төлөвлөгдсөн.

• Монгол Улсын Ерөнхий сайдыг огцруулах санал
• Монгол Улсын 2026 оны төсвийн тухай, Үндэсний баялгийн сангийн 2026 оны төсвийн тухай, Нийгмийн даатгалын сангийн 2026 оны төсвийн тухай, Эрүүл мэндийн даатгалын сангийн 2026 оны төсвийн тухай хуулийн төслүүд /Засгийн газар 2025.09.01-ний өдөр өргөн мэдүүлсэн, хоёр дахь хэлэлцүүлэг/
•  Монгол Улсын 2026 оны төсвийн тухай хуулийн төсөлтэй хамт өргөн мэдүүлсэн хууль, тогтоолын төслүүд /Засгийн газар 2025.09.01-ний өдөр өргөн мэдүүлсэн, хэлэлцэх эсэх, асуулт, хариулт 120 минут/