НҮБ-ын Хүүхдийн Сангаас нярай хүүхдийн эрт илрүүлгийн “Тандем масс спектрометри” дэвшилтэт технологийн төхөөрөмжийг Монголд анх удаа оруулж иржээ.  

 Эх Хүүхдийн Эрүүл Мэндийн Үндэсний Төвд өнөөдөр төхөөрөмжийг хүлээлгэн өглөө. 

Монголд жил бүр 67 мянга гаруй хүүхэд мэндэлдэг. Дэвшилтэт шинжилгээний багаж хэрэгслийн хүртээмж бага байдгаас олон нярай эрсдэлд ордог. Сүүлийн 30 жилд ойролцоогоор 900 хүүхэд оройтож оношлогдсоны улмаас урьдчилан сэргийлж болох насан туршийн хүндрэлд орсныг судалгаа харуулж байна.  

Тандем масс спектрометри хэмээх энэ технологи нь дөнгөж төрсөн хүүхдээс нэг дусал цус авч, 25–30 төрлийн бодисын солилцооны эмгэг илрүүлэх өндөр нарийвчлалтай. Эдгээр эмгэгийг эрт оношилж, эрт эмчилж чадсанаар хүүхдийг ирээдүйд хөгжлийн бэрхшээлтэй болох, бүр цаашлаад амь насаа алдахаас ч сэргийлэх боломжтой юм.  

Тус төхөөрөмжийг худалдан авахад шаардлагатай 1,7 тэрбум төгрөгийн санхүүжилтийг НҮБ-ын Хүүхдийн Сангийн эрүүл мэнд, хөгжлийн элч Н.Цэлмүүний санаачилгаар, хандивын үйл ажиллагааны босгожээ.  

Нийт 17 компаниас өргөсөн хандивын ачаар тус  төхөөрөмжийг санхүүжилт боссоноос хойш ердөө хоёр долоо хоногийн хугацаанд авчирсан. 

“Монгол Улсад эх, нярай, хүүхдийн эрүүл мэндийн эмчилгээ үйлчилгээг сайжруулах чиглэлд НҮБ-ын Хүүхдийн Сангаас тасралтгүй хэрэгжүүлж буй олон ажлын нэг нь энэ төхөөрөмж юм.  Нярайн оношилгооны шинэ үе эхэллээ гэж болно.  Мөн хувийн хэвшлүүд хүчээ нэгтгэж чадвал хурдтай ажиллаж, хүүхдийн сайн сайхны төлөө бодит хувь нэмэр оруулах боломжтойг харуулсан сайн жишиг боллоо” хэмээн НҮБ-ын Хүүхдийн Сангийн Суурин төлөөлөгч Эваристе Коуасси-Комлан онцлов.  

Эх сурвалж: НҮБ-ын Хүүхдийн Сан