CNN телевиз дэлхийн улс орнуудын инноваци, технологийн шийдлүүдийн талаар үзүүлдэг Blueprint нэвтрүүлгээрээ үндэсний технологийн компани UBCab-ийг онцолжээ.

Монгол Улсын хувьд хаягжилтын мэдээлэл бүрэн бус байдгаас гадна олон нийтийн хэрэглэж заншсан хаяг албан ёсны хаягаас зөрүүтэй байдаг асуудлыг UBCab-ийн хамт олон хэрхэн шийдэж, Монголчуудын хэрэглээний онцлогт тохирсон өөрсдийн гэсэн хаягжилтын системийг бүтээн, хөгжүүлж буй талаар UBCab-ийн удирдлага болон жолооч нарын төлөөлөлтэй ярилцсан нь энэ дугаарт багтсан байна.

UBCab-ын хувьд анх байгуулагдсан цагаасаа Google Maps-д суурилсан өөрсдийн гэсэн газрын зургийн мэдээллийн датабаазыг хөгжүүлэн ажиллаж байгаа бөгөөд өнгөрсөн оноос эхлэн Google-ийн Азийн бүс хариуцсан нэгжтэй хамтын ажиллагаагаа өргөжүүлэн ажиллаж байна.

Мөн аливаа улс орны хот суурин газруудын хаягжилтын систем нь үндэсний аюулгүй байдалд ихээхэн ач холбогдолтой дэд бүтэц бөгөөд энэ системийг дотоодын компаниуд өөрсдөө хөгжүүлж, хянаж байх нь чухал билээ.

UBCab-ыг анх 2013 онд Монголд технологийн бизнесийг хөгжүүлэх хүсэл мөрөөдөлдөө хөтлөгдcөн 4 багын найз үүсгэн байгуулж байжээ. Харин өнөөдөр UBCab үндэсний хэмжээний технологийн компани болж, Улаанбаатар хотоос гадна орон даяар 16 суурин газрын хэрэглэгчдэд үйлчилж, тэдний алтан цагийг хэмнэж байна.