УИХ-ын Эдийн засгийн байнгын хорооны хурлаар Эдийн засгийн эрх чөлөөний тухай хуулийн төслийг хэлэлцэж байна.

УИХ-ын гишүүн Ч.Лодойсамбуу "Би улс төржөөгүй. Ерөнхий сайдыг үнэхээр олж харахгүй байна. Тэр хүн ухаалаг, ажилсаг гэдгийг бид бүгд мэднэ. Гэхдээ Г.Занданшатар Ерөнхий сайд ингэсхийж байгаад л 2027 оны Ерөнхийлөгчийн сонгуульд орох гээд олон нийтийн хэл амнаас айгаад, юу ч хийхгүй байна, дорвитой ажил хийхгүй байна. Засгийн газар их залхуу байна. ажил хийхгүй байна. Бид шүүмж хэлэхээр урдаас "Тэгвэл ажлын хэсэг байгуулаад, та нар ороод ажилла"  гэдэг боллоо. Засгийн газрын ажлыг УИХ хийж байна. Хөл толгой нь олдохоо байлаа" гэв.  

Эдийн засгийн хөгжлийн сайд Ж.Энхбаяр байнгын хорооны гишүүний асуултад хариулж байна. Эдийн засгийн эрх чөлөөний хуулиар төрийн эдийн засаг дахь оролцоог хумих, гадаад, дотоодын хөрөнгө оруулагчдад эерэг мессеж өгөх зорилго агуулжээ. Хуулийн төслийг хаврын чуулган гэж хойшлуулалгүй, яаралтай батлахыг Ж.Энхбаяр сайд хүслээ.

УИХ-ын гишүүн Л.Энх-Амгалан: Энэ хуулийн төсөл бэлэг тэмдгийн шинжтэй байна, шийдэл алга. Монгол улс гаднын эдийн засаг, бизнесийн сургуулиудад муу жишээ болж, бидний гаргасан алдааг битгий давтаарай гэж гаднын их сургуулийн багш нар оюутнуудадаа зааж байгаа нь их харамсалтай гэв.

УИХ дхь АН-ын бүлэг энэ хуулийн төслийг хэлэлцэх, эсэхийг хэлэлцэх хурлаас тав хоногийн завсарлага авахыг хүслээ. Энэ талаар УИХ-ын гишүүн, АН-ын бүлгийн дэд дарга Б.Жаргалан танилцуулав. Энэ хугацаанд АН-ын бүлэг тус хуулийн төсөл дээр саналаа нэгтгэнэ. Тэрээр монгол хүн бүр, айл бүр эдийн засгийн эрх чөлөөг сүүлийн 30 жилийн турш хүсэж хүлээсэн гэв.

УИХ-ын гишүүн П.Сайнзориг "Нэг сайд гарч ирээд бизнесүүдийн эсрэг юм ярьдаг, нөгөө нь огт өөр юм ярьдаг. Хувийн хэвшлийнхний толгой бүр эргэчихсэн. Засгийн газар яг ах гээд байгаа нь ойлгомжгүй болчихсон. Эдийн засаг, бизнестэй холбоотой шийдвэр гаргахдаа, нам харгалзалгүй, хараат бусаар шийддэг байя" гэв.