Ээждээ гологдсон бяцхан сармагчин чихмэл тоглоомоо байнга тэврэн явж буй бичлэг цахимд олон хүний сэтгэлийг хөдөлгөжээ.

Голсон эх дээрээ эсвэл өөр нэгэн сармагчин руу дөхөн очсон ч түлхэн гадуурхагдаж, эцэст нь тэрбээр орангутан шиг дүрстэй чихмэл тоглоомоо тэврэн тайвширч байв. Хаа явсан газраа өнөөх зөөлөн тоглоомоо гараас нь хөтлөн чирж, тэврэн унтаж өөрийгөө саатуулна. Амьтны хүрээлэнгийн ажилтан орж ирэхэд хөлнөөс нь зууран тавихгүй, зүүгдэнэ.  Энэхүү дүр зураг дэлхийн олон хүний сэтгэлийг хөдөлгөсөн юм. 

Панч хэмээх энэхүү бяцхан сармагчин нь Японы нэгэн амьтны хүрээлэнд амьдардаг. Тэр өнгөрсөн оны долдугаар сард төрснийхөө дараахан эхдээ гологдсон байна.

Асран хамгаалагчид нь түүнийг тайвшруулахын тулд зөөлөн тоглоом өгсөн бөгөөд тэр тоглоомоо чирж яван, тоглож буй бичлэгүүд энэ сарын эхээр цахимд тархаж, Панч олны танил болжээ.

“Ora-mama” хэмээн хочилсон уг тоглоом нь түүний байнгын хамтрагч, найз нь болсон байна. Бичлэгүүд олон хүний сэтгэлийг хөдөлгөж, “Keep going, Punch” гэх хаштаг хүртэл үүссэн бөгөөд дэлхий даяар хүмүүс түүнийг хэрхэн өсөн торниж буйг харж байлаа.

Амьтны хүрээлэнгийн албаныхны мэдээлснээр Панч одоо бусад сармагчнуудтайгаа аажмаар дасаж, нэгдэж эхэлжээ.

Эхний оролдлогууд нь нэлээд хүнд байсан ч байдал эерэгээр эргэжээ. Саяхан өөр нэг сармагчин түүнийг арьс үсийг нь арчилж буй нь ажиглагдсан байна. Сармагчдын сүрэгт "бөөс түүх" нь зүгээр нэг цэвэрлэгээ биш, харин итгэлцэл, дотно харилцаа, бүлэгт хүлээн зөвшөөрөгдсөний илрэл юм.

Мөн амьтны хүрээлэнгийн нийтэлсэн бичлэгүүдэд Панч бусад жаахан сармагчнуудтай тоглож, нуруун дээр нь авирч буй нь харагдсан. Мөн нэгэн ахимаг насны сармагчин түүнийг тэвэрч буй нь бичлэгт харагдсан бөгөөд ажиглагчид үүнийг Панч одоо ганцаараа биш болсон сайны дохио хэмээн тайлбарлажээ.

Амьтны хүрээлэнгийн асрагч Шүмпэй Миякоши “Тэр бусад сармагчнуудтай идэвхтэй харилцаж байгаа. Бид түүнийг том болж, төлөвшиж байгааг харж байна. Тэр бусад сармагчдад гадуурхагдаж, загнуулсан ч тэр хурдан сэргэж чаддаг. Сэтгэлзүйн хувьд хүчтэй” гэжээ.

Өмнө нь асрагч Коскэ Шикано түүний зөөлөн тоглоомын талаар “Тоглоомын үс нь барихад амар, мөн гадаад төрх нь сармагчинтай төстэй нь аюулгүй мэдрэмж төрүүлсэн байх. Тэр зөөлөн тоглоом түүний хувьд ээжийг нь орлодог” хэмээн ярьжээ.

Панчийн амьдралын тухай мэдээ цахим орчинд олны сэтгэлийг хөдөлгөсөн бөгөөд инстаграм хэрэглэгчдийн нэг “Найзтай болно гэдэг амаргүй! Панч үнэхээр зоригтой! Түүгээр маш их бахархаж байна” хэмээн бичжээ.

Панчийн түүхэнд сэтгэл нь хөдөлсөн IKEA Japan компанийн ерөнхийлөгч Петра Фаре амьтны хүрээлэнд зочлох үеэрээ хэд хэдэн зөөлөн тоглоом хандивласан байна. Энэ бүхний эцэст тэр өөрийн төрлийн сармагчнуудтайгаа дасан зохицож, сүргийн нэг болж чадсанд хүмүүс ихэд баяртай байна. 

Эх сурвалж: www.independent.co.uk