Дэлхий нийтээр жил бүрийн 12-р сарын 1-ний өдрийг ХДХВ, ДОХ-ын асуудалд анхаарал хандуулах өдөр болгон тэмдэглэдэг. 2025 оныг “Асуудлыг шийдье, ДОХ-ын эсрэг хариу арга хэмжээг сайжруулъя” уриан дор тэмдэглэлээ.

Энэ жилийн ХДХВ, ДОХ-той тэмцэх өдрийг ЭМЯ, ДЭМБ, ХӨСҮТ, Сонгинохайрхан нэгдсэн эмнэлэг хамтран халдвараас урьдчилан сэргийлэхэд хүн бүрийн оролцоог нэмэгдүүлэхэд анхаарч нөлөөллийн өдөрлөг арга хэмжээг Сонгинохайрхан Нэгдсэн эмнэлэгт зохион байгуулжээ.

“Асуудлыг шийдье, ДОХ-ын эсрэг хариу арга хэмжээг сайжруулъя” нөлөөллийн үйл ажиллагаанд Эрүүл мэндийн яамны БЗДХ/ХДХВ/ДОХ/Сүрьеэ, вируст гепатиттай тэмцэх бодлогын хэрэгжилтийн зохицуулалт хариуцсан ахлах мэргэжилтэн Ц.Ундрал, ДЭМБ-ын Монгол дахь суурин төлөөлөгч Сокарро Эскаланте, ДЭМБ-ын Монгол Улс дахь суурин төлөөлөгчийн газрын Халдварт болон Халдварт бус өвчний нэгдсэн хяналт хариуцсан мэргэжилтэн Шалала Ахмадова, ХӨСҮТ-ийн дэд захирал Б.Азжаргал, Нийслэлийн Эрүүл мэндийн газрын ахлах мэргэжилтэн А.Ербахыт, Сонгинохайрхан нэгдсэн эмнэлгийн дэд захирал Б.Баяндалай болон бусад албаны хүмүүс оролцлоо. Мөн СХД-ийн 105 дугаар сургуулийн 12 дугаар ангийн сурагч Б.Амин-Эрдэнэ оролцож үеийнхээ залуучуудад хандаж уриалга хүргэлээ.

ДЭМБ-ын суурин төлөөлөгч Соккарро Эскаланте бэлгийн замаар дамжих халдвар нь нийтийн эрүүл мэндийн халдварт өвчин учраас халдварыг  бууруулахад залуучуудын оролцоо маш чухал болохыг онцолж байлаа.

ХДХВ, ДОХ-ын эсрэг энэ удаагийн нэгдсэн арга хэмжээ нь хүн бүрийн оролцоог нэмэгдүүлэх, иргэдийн ойлголт, мэдлэгийг сайжруулах, нөлөөллийн үйл ажиллагаанд иргэдийг татан оролцуулах зорилго агуулгаараа онцлог байв.



Монгол Улсын хувьд ХДХВ-ийн халдварын анхны тохиолдол 1992 онд бүртгэгдсэнээс хойш өнөөг хүртэл нийт 424 хүн ХДХВ-ийн халдвараар оношлогдож, ХДХВ-ийн халдварын тархалтын тооцооллоор 2025 онд 694 хүн ХДХВ-ийн халдвартай амьдарч байх магадлалтай байна.

2021 онд НҮБ-ын Ерөнхий Ассамблей 95-95-95 зорилт буюу ХДХВ-ийн халдвартай хүмүүсийн 95 хувийг оношилж, 95 хувийг эмчилгээнд хамруулан, үүнээс 95 хувийнх нь вирусийн ачааллыг дарангуйлах зорилт тавьжээ.

Монгол Улсын хувьд 95-95-95 зорилт нь:

• ХДХВ-ийн халдвартай гэдгээ мэддэг хүн 47 хувь
• Ретровирусийн эмчилгээнд хамрагдсан хувь
• Вирусийн идэвх дарангуйлагдсан 94 хувь байна.