Тэргүүн шадар сайд Н.Учралын ахалж буй “Экспортыг нэмэгдүүлж, импортыг дэмжих” ажлын хүрээнд гаалийн хяналтын журмыг шинэчилж, цахимжуулжээ.

Өмнөх журамд авто замаар оруулж буй бараа, тээврийн хэрэгслийг 85 алхмаар хянан, улсын ахлах байцаагчаас хамаарсан 55 удаагийн үйлдэл хийдэг байсан бол шинэчилсэн журмаар энэ дарамтыг халж, цахим систем нэвтрүүлсэн байна. 

Ингэснээр Гаалийн хяналт цахимд шилжиж, зарим шаардлагагүй заалтыг хассанаар хүнээс буюу гаалийн байцаагчаас хамаарсан хүнд суртал багасаж байна.

Энэ нь иргэдэд учрах хүнд суртлыг бууруулахаас гадна, гаалийн ажилтнууд хувийн мэдрэмжээрээ шийдвэр гаргаж чирэгдэл учруулдаг байдал арилна гэдгийг Эдийн засаг, хөгжлийн яамнаас мэдээлэв.

Шинэчилсэн журамд дараах гол өөрчлөлтүүд оржээ.

•  Гаалийн мэдүүлгийг баталгаажуулах ажлыг цахимжуулж www.gaali.mn CAIS системд оруулав
• Улсын байцаагчийг CAIS системээр дамжуулж автоматаар томилно. 
• Баримт бичгийн бүрдүүлэлтийг цахимаар илгээнэ
• Рентген зургийг PDF файл болгон импортын ачааны манифестад хавсарган илгээдэг байсныг цуцалж цахим системд оруулав
• Барааны дагалдах бичиг баримт болон Гаалийн тухай хуулийн 35.5-д заасан бичиг баримтыг гаалийн байгууллагад цаасаар хүлээлгэж өгөх журмыг халж цахимд оруулав
• Авто замаар тээвэрлэн улсын хилээр оруулах бараа, тээврийн хэрэгслийг хилийн гаалийн байгууллага хяналтын бүсэд оруулах үед жинлэж, жингийн мэдээлэл CAIS системд автоматаар бүртгэгддэг боллоо.
• Гаалийн хилээр оруулах бараа, тээврийн хэрэгслийг гаалийн байгууллага хооронд цахимаар /ачааны манифестаар/ 3 цагийн дотор хяналтад явуулна.
• Эрсдэлийн программаар тодорхойлсон бараа, тээврийн хэрэгсэлд гаалийн хяналт тавих төлөвийг өөрчлөх зохицуулалтыг хассан. Ингэснээр гаалийн хяналт тавих төлөвийг зөвхөн эрсдэлийн программаар тодорхойлно.

ГЕГ энэхүү шинэ журмын талаар иргэд, аж ахуйн нэгжүүдийг тогтмол мэдээллээр хангаж, мөрдөхөөр болжээ.