УБТЗ галт тэргээ нэгээр нэмэхэд жилд 53 тэрбум төгрөгийн орлого олох боломжтой юм байна. 50 вагонтой нэг цувааг нэг галт тэрэг гэдэг.  

Монгол, ОХУ, БНХАУ-ын төмөр замын төлөөлөгч нар, энэ сарын 25-29-нд хилийн боомтоор солилцох ачаа, зорчигч, тээврийн асуудлаар хуралдана.  

УБТЗ-аар тээвэрлэх ачааг нэмснээр эдийн засагт эерэг нөлөө үзүүлж, уул уурхайн бүтээгдэхүүний экспорт нэмэгдэх  ач холбогдолтой. Манай улс БНХАУ-тай хоногт 15 ба түүнээс дээш галт тэрэг солилцож байна. Галт тэрэгний тоог нэгээр нэмэхэд ачаа тээврийн хэмжээ 1.5 сая тонноор нэмэгдэнэ.  

 
Ингэснээр 14 сая ам.доллар буюу 53 тэрбум төгрөгийн орлого олох боломжтойг онцоллоо. 

УБТЗ-ын Тээвэр хариуцсан орлогч дарга Д.Амарбаясгалан, Гурван хөрш орны төмөр зам галт тэргээ хэрхэн солилцох, ачаа тээврийн зохион байгуулалт, цахим системийг нэвтрүүлэх тухай төвлөрч ярилцана. Мөн Замын Үүд өртөөний хөгжүүлэлтэд анхаарч Хятадын төлөөлөгчидтэй  ярилцана гэв. 

Өсөн нэмэгдэж буй тээврийн эрэлт хэрэгцээг хангаснаар, бүс нутагт өрнөж буй худалдаа, эдийн засгийн тэлэлтэд тус болох юм. УБТЗ ХНН 2024 онд 33.4 сая тонн ачаа тээвэрлэжээ. Үүний  

• 5.3 сая нь транзит буюу дамжин өнгөрүүлсэн тээвэр,  
• 11.6 сая тонн нь экспорт, 
• 3.8 сая тонн нь импортын ачаа байжээ.  

Эндээс харахад нийт ачаа тээврийн 62 хувийг гадаад худалдааны ачаа эзэлсэн байна.   

А.Мичидмаа